Miaso (Masamu) 40 - MUKANDA USANDU WA ZAMBI 1975

Kuli Njimba mukwa lutwe. Samu lia David.

¹ Natwaminyinyine Yehova ni uhumikizo; iye wahetamine kuli yami, wevwile muteto wami.

² Wanguchijile nawa mu wina upi, mu malowa a kutwema. Wasele yiliato yami ha liwe, wakolesele kwenda chami.

³ Wasele mwaso waha mu kanwa liami, ewa, uhaliso kuli Zambi yetu. Anji machimona mba mevwa woma, mafuliela Yehova.

⁴ Kawaha yoze mafuliela Yehova, keshi kulemesa akwa kulengumuka, chipwe waze akupianguka ku mahuza.

⁵ Yehova Zambi yami, yitanga ya kukomwesa yize walinga, yinji. Manyonga je kuli yetu anji. Keshi kuhasa kwalumbununa kuli yena. Nyi kachi mungwaambulula ni kwahanjika, ahiana chize mutu mahasa kwalula.

⁶ Kushi kuwahilila ni yitapo ni milambu. Matwi jami hiunaajikula. Milambu ya kulumba ni milambu ha shili kwayifupile.

⁷ Henaho nambile ngwami, Talenu hinguneza. Mu mukanda wa kuvunga chinasonewa ha kutwala kuli yami.

⁸ Ngunawahilila kulinga upale we, Zambi yami. Ewa, shimbi je jinasonewa muchima lia mbunge yami.

⁹ Hinambujola ululi mu chikungulwila chinene. Talenu, chichi kuholesa mivumbo yami, Yehova yena unachinyingika.

¹⁰ Chaswekele ululi we mu mbunge yami, hinambujola kushishika che ni ulamwino we. Chaswekele utu wa zango lie ni umwenemwene we ku chikungulwila chinene.

¹¹ Yehova, kanda ungumina keke ye. Utu wa zango lie ni umwenemwene we ukangufunge matangwa eswe.

¹² Mumu yuma yipi yahiana kwalula hiyanguseleka. Uhenge wami hiwanguwana, chocho chahashile kuhetuka: wahiana kambu ja ha mutwe wami, kashika mbunge yami hiyalezumuka.

¹³ Chikupemene kama Yehova kungupulula. Tambuka kama ungukwase Yehova.

¹⁴ Waze eswe akufupa mwono wami kuwonwona akevwe sonyi, alitupieke hamuwika. Akachinduluke, akasauke, waze akuwahilila ha yikola yami.

¹⁵ Waze akwamba kuli yami ngwo, Wulo! akafulwe mumu ha sonyi jo.

¹⁶ Waze eswe akukufupa, akevwe chiseke, awahilile muli yena. Waze azanga ulamwino we akambe matangwa eswe ngwo, Yehova afumane.

¹⁷ Ami nguli chiswale kanda mukwa kuhona, hindu Mwene kakungunyonga. Yena uli chikwashi chami kanda mukwa kungupulula; kanda ulaluka Zambi yami. Kuli Njimba mukwa lutwe. Samu lia David.