Miaso (Masamu) 4 - MUKANDA USANDU WA ZAMBI 1975

¹ Zambi ya ululi wami, ungwivwe kama muze mungutambika. Muze napwile mu luyinda wanguselele muhela unene. Nguvwile kama vumbi, wivwe kulemba chami.

² Enu ana ja atu ndo mwiji muka munwalumuna ulemu wami ukapwe sonyi? Ndo mwiji muka munuzanga kulenga chamokomoko nikufupa mahuza?(Litulike.)

³ Alioze nyingikenu ngwo, Yehova kakulisela mukwa uwayilo hali iye mwene. Yehova kumevwa muze mungutambika kuli iye.

⁴ Ivwenu woma, kanda nuvulumuna. Lishimwinyenu ni mbunge ja yenwene ha mihela yenu nukahole.(Litulike.)

⁵ Lambulenu yitapo ya ululi, fulielenu muli Yehova.

⁶ Anji kakwamba ngwo, Iya matulweza chuma chipema? Yehova, hetula pangu lia meso je hali yetu.

⁷ Hiunase chiseke mu mbunge yami, kuhiana chize mapwa nacho muze mbuto yo ni vinyu yo hiyoka.

⁸ Mungupomba, munguya tulo ni sambukila, mumu yena Yehova wika kuwakungutwamisa kawape.