Miaso (Masamu) 39 - MUKANDA USANDU WA ZAMBI 1975

¹ Nambile ngwami, Mungutala kanawa majila jami, kuchina munguvulumuna ni limi liami. Mungutunga kanwa liami ni kata shimbu yingulungulu anamana kumeso jami.

² Naholele ngwe kamama, chahanjikile chipwe yuma yipema, mba chinyengo chami chavundukile.

³ Mbunge yami yasasaminyine muchima. Shimbu napukwine kahia kalengenyene, mba nahanjikile ni limi liami ngwami,

⁴ Yehova ngunyingikise kama songo liami, ni cheseko cha matangwa jami chize chapwa. Ngulweze kama ulelu wami.

⁵ Kumanyi, hiwatenga mwono wami ngwe wakweseka ni kwoko. Miaka ya mwono wami yapwa nichimwe kumeso je. Chamwenemwene mutu mweswe chipwe wa ngú, kapwa wamokomoko.(Litulike.)

⁶ Chamwenemwene atu eswe kakwenda mu kulinga chamokomoko; pundu kakupinda chamokomoko. Kakulumbika upite alioze kanyingikine yoze maukongolola.

⁷ Mba haliapwila Mwene, yika ngunashimbwila? Kutalatala chami chili muli yena.

⁸ Ngupulule kama ku Utanguko wami weswe. Kanda ungupwisa ngwe sau lia yihepuke.

⁹ Napwile kamama, chapakwile kanwa liami mumu yena wachilingile.

¹⁰ Chiza kama kulamba che kuli yami. Janguhwa ni kungumbufula ni kwoko lie.

¹¹ Muze mululamisa mutu nikumwambila mumu ha uhenge, upeme wenyi muuhwa ngwe ndulu. Pundu atu eswe kapwa amokomoko.(Litulike.)

¹² Yehova, wivwe kama kulemba chami. Panjika ku muteto wami. Kanda uhola ha kumona masoji jami mumu nguli chilambala kuli yena, nguli ngeji ngwe akaka eswe.

¹³ Kanda ungulamba, hanga ngukawane tachi shimbu kanda nguchikatuka hano, mba chishiho nawa.