Miaso (Masamu) 38 - MUKANDA USANDU WA ZAMBI 1975

¹ Yehova, kanda ungwambila ni ufwatulo we; kanda ungufumba ni kusasaminya cha wuli we.

² Mumu mivu ye yangutwa; kwoko lie liangushata chikolo.

³ Ungunu wakuhi mu musunya wami mumu ha matoto je. Chipwe kuhwima kuchishimo mu yifwaha yami mumu ha shili yami.

⁴ Mumu uhenge wami wanguhiana helu lia mutwe wami. Wangulemena naye ngwe chiteli chilemu.

⁵ Yilonda yami yanuka; yapola mumu ha uhepuke wami.

⁶ Ngunapinji, ngunafumbama chikolo. Nakulinyenga tangwa lieswe nganganga.

⁷ Mumu miongo yami ya tò ni kusasaminya. Ungunu wakuhi mu musunya wami.

⁸ Ngunalezumuka. Hanangumbwezula. Hinateta mumu ha kupinda cha mbunge yami.

⁹ Mwene, kuzanga chami cheswe chili kumeso je. Mikuma yami kuyishi kuswama kuli yena.

¹⁰ Mbunge yami yinapeleta; tachi jami jinanguhu. Chipwe pangu lia ku meso jami hiliangukatuka.

¹¹ Akwa kunguzanga ni masepa jami kanamana kusuku ni musongo wami. Usoko wami no kusuku anamana.

¹² Chikwo nawa waze akufupa mwono wami kakungutela makambwila. Waze akufupa kungulemeka kanahanjika yuma yipi; kakutaka yuma ya kwonga tangwa lieswe.

¹³ Alioze yami, ngwe nguli kafwa-matwi, chevwile. Nguli ngwe kamama yoze keshi kupakula kanwa lienyi.

¹⁴ Ewa, nguli ngwe yoze keshi kwivwa; yoze keshi ni kumbululo mu kanwa lienyi.

¹⁵ Mumu muli yena Yehova nakutalatala, kumukangukumbulula, yena Mwene Zambi yami.

¹⁶ Mumu nambile ngwami, Kuchina manguyunga. Muze chiliato chami muchisenunuka o malisamba ni yami.

¹⁷ Mumu ngunambe kulimbuka. Chinyengo chami chili kumeso jami tangwa lieswe nganganga.

¹⁸ Mungwambulula uhenge wami; mungupihilila ha shili yami.

¹⁹ Alioze akwa kole jami mwono wunji akwete, kanatakama; waze ananguvwila kole yamokomoko hoka.

²⁰ Waze akufweta yipi ha yipema hanalumuka akwa kulimika ni yami mumu nakukaula chuma chize Chinapeme.

²¹ Kanda ungwehuka Yehova. Zambi yami kanda umana kusuku ni yami.

²² Tambuka ungukwase, Mwene ulamwino wami. Kuli Njimba mukwa lutwe. Ha Yedutune. Samu lia David.