Miaso (Masamu) 37 - MUKANDA USANDU WA ZAMBI 1975

¹ Kanda ulifwita mumu hali akwa kulinga yipi. Chipwe waze akulinga ungulungulu kanda wavwila ukwa.

² Mumu nikawashi maateta ngwe mwambu, malela ngwe yambu ya wisu.

³ Fuliela Yehova, ulinge yipema. Chocho mukatwama mu chifuchi; chamwenemwene makakulisa.

⁴ Wahilila nawa muli Yehova, iye kumakwaha cheswe unazange mu mbunge ye.

⁵ Kunjika jila ye kuli Yehova; mufuliele iye, mba makulingilacho.

⁶ Iye kumafumanyisa ululi we ngwe pangu, ni chiyulo che ngwe tangwa ha muchima.

⁷ Hwima hali Yehova, umutwaminyine ni uhumikizo. Kanda ulifwita mumu hali yoze wakuwaha mu jila yenyi, hanji hali yoze wakumanununa kutaka chenyi chipi.

⁸ Litwamine utenu; china ufwatulo; kanda ulifwita, mumu chatwala ku yitanga yipi wika.

⁹ Mumu akwa kutanga yipi kumakaapatula, alioze waze akutwaminyina Yehova kumakahinga chifuchi.

¹⁰ Mumu kwasala hakehe mba yingulungulu hi akuhi, ewa, mutala kanawa mu chihela chenyi alioze iye keshiko.

¹¹ Alioze yimbovu kumahinga chifuchi. Kumawahilila mu kulumbama cha sambukila.

¹² Yingulungulu kakutwama punga mukwa ululi, kakulikopola ku mazo hali iye.

¹³ Mwene kumamuseha mumu kanamono ngwenyi, Tangwa lienyi kulineza.

¹⁴ Yingulungulu hatomona katana, hanana uta wo, akalimbule chiswale ni mukwa kuhona, akashihe akwa kululama mu jila.

¹⁵ Katana ko kumanjila mu mbunge yo ene, ni mata jo kumamakuka.

¹⁶ Chize chikepe mukwa ululi ali nacho chahiana upite wa kulumbama wa yingulungulu anji.

¹⁷ Mumu kumamakuna moko ja yingulungulu, alioze Yehova kakukolesa akwa ululi.

¹⁸ Yehova kananyingika matangwa ja mutu mungunu, ni chihinga chenyi muchipwa cha mutolo.

¹⁹ Kechi kwivwa sonyi ha tangwa lipi. Ha matangwa ja kapunga kumakakuta.

²⁰ Alioze yingulungulu kumakatoka, ni akwa kole ja Yehova kumapwa ngwe uhenya wa mwambu; kumahwa, ngwe mwishi m uwanduka.

²¹ Yingulungulu kakulambula alioze keshi kuhilwisa, alioze akwa ululi kakulinga ni vumbi, kakuhana lume.

²² Waze maawahisa iye, kumahinga chifuchi, alioze waze maashinga makaapatula.

²³ Yehova kakukolesa ngano ja mutu; kakuwahilila mu jila yenyi.

²⁴ Chipwe malimbuka kechi kulilamba hashi liakulu, mumu Yehova kakumukwata ku kwoko.

²⁵ Napwile mukweze, haliapwila nguli mukulwana, hindu chamwene mukwa ululi hanamwehuka, hanji munyachi wenyi mafupafupa ya kulia.

²⁶ Tangwa lieswe iye mukwa vumbi; kakuhana, mba munyachi wenyi muukawaha.

²⁷ China yuma yipi; linga yuma yipema ukatwame ku miaka ya mutolo.

²⁸ Mumu Yehova kakuzanga chiyulo; keshi kwehuka asandu jenyi; kakwafunga ku miaka ya mutolo. Alioze munyachi wa yingulungulu kumakaupatula.

²⁹ Akwa ululi kumakazuka chifuchi; kumakatwamamo ku miaka ya mutolo.

³⁰ Kanwa lia mukwa ululi kuliakuhana mana, limi lienyi kuliakuhanjika chiyulo.

³¹ Shimbi ya Zambi yenyi yili mu mbunge yenyi; shimbo jenyi kujishi kusenunuka.

³² Chingulungulu kakutala mukwa ululi. Kakufupa kumushiha.

³³ Yehova kechi kumuhichika mu kwoko lienyi; kechi kumuhisa muze mamusopesa.

³⁴ Twaminyina Yehova. Funga jila yenyi, mba makunangamisa ukahinge chifuchi. Muze mapatula yingulungulu mukachimona.

³⁵ Hingunamono yingulungulu ni ndundo jinene nikutanda ngwe mutondo wa wisu mu mavu jawo.

³⁶ Alioze napalikile, kumanyi keshiko. Ewa, namufupile alioze Chahashile kumuwana.

³⁷ Usele chinyingi hali mutu mungunu; tala mwe mukwa kululama, mumu songo lienyi mulipwa sambukila.

³⁸ Alioze yitanguke kumakaonwona hamuwika; songo lia yingulungulu kumakalitetako.

³⁹ Alioze Yehova iye ulamwino wa akwa ululi; iye mbonge yo ha mwaka wa lamba.

⁴⁰ Yehova kakwakwasa nikwapulula. Kakwapulula kuli yingulungulu; kakwalamwina mumu haswama muli iye. Samu lia David, lia kwiwulula.