Miaso (Masamu) 36 - MUKANDA USANDU WA ZAMBI 1975

Kuli Njimba mukwa lutwe. Samu lia David kavumbi ka Yehova.

¹ Utanguko wa chingulungulu kuunambe mu mbunge yami ngwo, Kukushi woma wa Zambi kumeso jenyi.

² Mumu kakulichichimieka kumeso jenyi mwene, ndo ungulungulu wenyi muusoloka wa kuneha lwaji.

³ Maliji a mu kanwa lienyi a uhenge ni kwonga. Hambila mana ni yitanga yipema. Ha muhela wenyi kakutaka uhenge;

⁴ kakulisela jila yize kuyapemene. Yuma yipi keshi kuyivwila lwaji.

⁵ Utu wa zango lie uli mwilu, Yehova. Kushishika che chaheta ndo ku malelwa.

⁶ Ululi we wapwa ngwe milundu yisuku. Upatwilo we wapwa ngwe yimwe jondo yinene. Yena Yehova wakulamwina ni atu ni tushitu.

⁷ Zambi, utu wa zango lie upema chimwe! Kashika ana ja atu kaswama kushi lia mapulwa je.

⁸ Kumayuka liakulu ni maji a mu zuwo lie, ni yena kumwanwisa a ku lwiji wa yiwape ye.

⁹ Mumu kuli yena kwatwama lie fuji lia mwono. Mu pangu lie mba twakumona pangu.

¹⁰ Lindulula kama utu wa zango lie kuli waze anakunyingika, ni ululi we kuli waze analulama mu mbunge.

¹¹ Chiliato cha mukwa kulivwimba kanda chikanguheta; kwoko lia chingulungulu kanda likanguhuma.

¹² Kwenako akwa kulinga uhenge hanalimbuka. Haanungwina hashi kechi kuhasa kuhinduka. Samu lia David.