Miaso (Masamu) 35 - MUKANDA USANDU WA ZAMBI 1975

¹ Yehova, ulitachike ni waze akulitachika ni yami. Asa jita ni waze akwasa jita ni yami.

² Kwata ku lukepwe ni lukepwe munene, mana ungukwase.

³ Tomona kunga ukajikinyine waze anangukaula. Amba ku mbunge yami ngwe, Yami nguli ulamwino we.

⁴ Waze akufupa mwono wami akevwe sonyi, akasauke. Waze akutaka kungulemeka achinduluke, akachingashane.

⁵ Akapwe ngwe yizungu yize yinahehuka ni fuji, mungelo wa Yehova akaahehule.

⁶ Jila yo yikalé, yikasenunuke, mungelo wa Yehova akaahange.

⁷ Mumu hanangutela wanda wo mu wumbu, shili yamokomoko. Hanafulila wumbu mbunge yami hindu shili yamokomoko.

⁸ Kwonwona chikamutungumune. Mwene akafwe mu wanda uze aswekele. Aholokelemo nikulionwona.

⁹ Mbunge yami muyiwaha muli Yehova; muyiwahilila mu ulamwino wenyi.

¹⁰ Yifwaha yami yeswe muyamba ngwo, Iya walifwa ni yena Yehova? Yena wakupulula mukwa lamba kuli yoze wamuhiana ni tachi, ewa mukwa lamba ni mukwa kuhona wakwapulula kuli mukwa kupupa.

¹¹ Akwa kushindakenya mahuza kanasoloka, kanangulamikiza yuma chayinyingikine.

¹² Kakungwaha yipi ha yipema, akayindamise mbunge yami.

¹³ Alioze yami, muze ayijile nalijikile chikeleyi. Nayindamishine mbunge yami nikulitwamina kulia. Kulemba chami chahilukile mu tulo yami.

¹⁴ Nalingile ngwe iye sepa liami, hanji mwanakwetu. Nahetamine nikulishimwoka ngwe yoze malila naye.

¹⁵ Alioze o akungulukile nikuwahilila ha kutalinga chami. Yilamikiji angukungulukilile, ami chachinyingikine. Angupapulwile, kalitwaminyineko.

¹⁶ Ngwe yijiluke aze akulenya ha kutambula kulia, alikopwele mazo jo hali yami.

¹⁷ Mwene, ndo mwiji muka mutala tuhu? Pulula kama mwono wami ku kwonwona cho. Pulula mwanami wa wika kuli ndumba.

¹⁸ Mungukusakwilila mu chikungulwila chinene. Mungukuhalisa hakachi ka mbunga ya atu.

¹⁹ Waze anapu akwa kole jami shili yamokomoko, kanda watayiza kunguyunga. Waze akunguvwila kole kuyishi chikuma, kanda atenya ni meso jo.

²⁰ Mumu keshi kuhanjika ya sambukila, alioze kakutaka yuma ya kwonga ya kulimika ni waze anaholo mu chifuchi.

²¹ Ewa, apakwile makanwa jo kuli yami, ngwo, Wolo! wolo! mba meso jetu hachimona.

²² Yena Yehova hi wamona; kanda uhola. Mwene, kanda upwa kusuku ni yami.

²³ Kasumuka kama ulawile chiyulo chami ni chikuma chami, yena Zambi yami kanda Mwene wami.

²⁴ Ungupatwile nikulita ni ululi we, yena Yehova Zambi yami. Kanda anguyunga.

²⁵ Kanda amba mu mbunge jo ngwo, Ewa! Chocho tunazange. Kanda amba ngwo, Mba hitwamumina lume.

²⁶ Waze akuwahilila ha lamba liami akevwe sonyi, akachingashane hamuwika. Waze alitohesa kuli yami aakolese sonyi, asauke.

²⁷ Waze akwivwa kuwaha ha ululi wami alikwize nikuwahilila. Ewa, akambe matangwa eswe ngwo, Yehova atohe, yoze wakuwahilila ha kuyuka cha kavumbi kenyi.

²⁸ Limi liami mulikambulula ululi we ni uhaliso we tangwa lieswe nganganga.