Miaso (Masamu) 33 - MUKANDA USANDU WA ZAMBI 1975

¹ Wahililenu muli Yehova yenu akwa ululi. Uhaliso kuwatela hali akwa kululama.

² Sakwililenu Yehova ni kalialia; mwimbilenu uhaliso ni kalialia wa kumi lia kusa.

³ Mwimbilenu mwaso waha; imbenu yisaji ni kawino ni liji linene.

⁴ Mumu liji lia Yehova kuliapema; milimo yenyi yeswe kakuyilinga ni umwenemwene.

⁵ Kazanga ululi ni upatwilo. Hashi hazala tó ni utu wa zango lia Yehova.

⁶ Atangile malilu ku liji lia Yehova; chizavu chamo cheswe wachitangile ni mwiku wa mu kanwa lienyi.

⁷ Iye kakukunga meya a kalunga-lwiji ngwe mulumba; kakutulika meya a mu jondo mu machila.

⁸ Akwa hashi eswe avwile woma Yehova. Waze eswe atwama muno-muze apwe nikumuchikimina.

⁹ Mumu iye wahanjikile mba chalingiwile. Watuminyine mba chakolele.

¹⁰ Yehova kakupwisa yamokomoko yiyulo yeswe ya mavungu; manyonga eswe a atu kakwapwisa amokomoko.

¹¹ Alioze yiyulo ya Yehova yakola mbe ku miaka ya mutolo; manyonga a mbunge yenyi akola ndo ku yisemuko yeswe.

¹² Vungu lize likwete Yehova Zambi yo kuliawaha. Kawaha atu aze iye hatongola akapwe chihinga chenyi.

¹³ Yehova mwilu kakutala, kakumona ana ja atu eswe.

¹⁴ Kuma kwenyi kwa kutwama kakutala aze eswe atwama hano hashi;

¹⁵ Yoze wakuwumba mbunge jo jeswe; kakuzewula yitanga yo yeswe.

¹⁶ Mwanangana keshi kumulamwina ha kwoka cha yizavu. Chitakame keshi kumupulula ku tachi jenyi jinji.

¹⁷ Kavwalu wamokomoko ha kulilamwina nenyi, kechi kuhasa kupulula niumwe ni tachi jenyi jinene.

¹⁸ Liso lia Yehova kuliakutala kuli waze akumuvwila woma, ni waze akutwaminyina utu wa zango lienyi;

¹⁹ Akapulule mwono wo ku kutwa; akaafunge mwono mu kapunga.

²⁰ Mbunge jetu kujatwaminyina Yehova; iye chikwashi chetu ni lukepwe wetu.

²¹ Mumu mbunge jetu mujiwahilila muli iye, se twafuliela jina lienyi lisandu.

²² Yehova, utu wa zango lie Utwame hali yetu, chizechene ngwe twatalatala muli yena.