Miaso (Masamu) 32 - MUKANDA USANDU WA ZAMBI 1975

Samu lia David. Masakile.

¹ Kawaha yoze hanamukonekena uvulumunyi wenyi; shili yenyi hanayifuku.

² Kawaha mutu yoze Yehova keshi kumwalwila uhenge; mu Spiritu yenyi kumwatwamine kalimbalimba.

³ Muze naholele yifwaha yami yazeketele, mumu ha miku ma yami tangwa lieswe.

⁴ Mwalwa ni ufuku kwoko lie Kangulemene; tachi jami jomine ngwe changa cha lushiho.(Litulike.)

⁵ Natayile shili yami kuli yena, uhenge wami chauswekele. Nambile ngwami, Mungushikisa uvulumunyi wami kuli Yehova mba yena wakonekenene uhenge wa shili yami.(Litulike.)

⁶ Ha chikuma chino mweswe mukwa kuwayila akalembe kuli yena ha mwaka uze mahasa kukuwana. Chipwe muze meya a masanga masupwoka kechi kamuheta.

⁷ Yena uli chiswamo chami, mukangufunga ku lamba. Kumukangujingilika ni miaso ya kungupulula. (Litulike.)

⁸ Mungukufumba, mungukulongesa jila yize muwendelamo. Mungukwaha mana nikukutala ni liso liami.

⁹ Kanda upwa ngwe kavwalu hanji chimbulu keshi mana, kwahombwesa chatamba chikungo mu kanwa ni muhipu wa kwakwata nawo; nyi ka, kechi kukundama kuli yena.

¹⁰ Yinyengo yinji muyipwa kuli chingulungulu, alioze mweswe mafuliela Yehova, utu wa zango muumujingilika.

¹¹ Ivwenu chiseke muli Yehova, wahililenu yenu akwa ululi; likwizenu, wahililenu yenu eswe nwalulama mu mbunge.