Miaso (Masamu) 31 - MUKANDA USANDU WA ZAMBI 1975

¹ Muli yena Yehova ngunafuliela, kanda angukolesa sonyi. Ungupulule kama ni ululi we.

² Hetamisa twitwi lie kuli yami, ungupulule kama nikawashi. Upwe kuli yami liwe lia tachi, mbonge ya kungulamwina.

³ Mumu yena uli liwe liami ni mbonge yami; kashika ungutetekele, ungusongwele mumu ha jina lie.

⁴ Unguchange ku wanda uze hanangutela ku lumbu, mumu yena uli tachi jami.

⁵ Mu kwoko lie ngunakunjika Spiritu yami. Yehova, yena hiwangukula, uli Zambi ya umwenemwene.

⁶ Nakuvwila kole waze akutala yuma yamokomoko ya mahuza, alioze yami kunafuliela Yehova.

⁷ Munguwahilila ni chiseke mu utu wa zango lie, mumu hi wamona luyinda wami; hiwanyingika lamba lia mbunge yami.

⁸ Kuwatayijile akwa kole kungukakachila mu kwoko lio; hiwasa yiliato yami ha chihela chinene.

⁹ Nguvwile kama vumbi Yehova mumu ngunapinji; liso liami linajijiminya ni chinyengo, ewa, ni mbunge yami ni mujimba wami.

¹⁰ Mumu mwono wami wanguhwa ni chinyengo. Miaka yami hiyahwa ni mikuma. Tachi jami jinatepuluka mumu ha uhenge wami; yifwaha yami hiyalishisa.

¹¹ Kunapwa luchoko mumu hali akwa kulimika jami, ewa, kuhiana kuli akwetu natunga no. Nakuvwisa woma sepa liami. Waze akungumona haze kakunguchina.

¹² Hanguvulama ngwe mufu hanamuchiza mbunge. Hinapwa ngwe ndeho yize hiyafwa.

¹³ Mumu hinevwa kulamikiza cha anji, ni woma sali ni sali, shimbu mangutwama punga. Alitesele kuchiza mwono wami.

¹⁴ Hindu nafulielele yena Yehova. Nambile ngwami, Yena uli Zambi yami.

¹⁵ Miaka yami yili mu kwoko lie. Ngupulule kama ku kwoko lia akwa kole jami, kuli waze akunguhungumiona.

¹⁶ Meso je apanguluke hali yami kavumbi ke, ungulamwine ku utu wa zango lie.

¹⁷ Kanda angukolesa sonyi, Yehova, mumu hali yena hinatambika. Yingulungulu akevwe sonyi; akahole mu Shiole.

¹⁸ Mivumbo ya mahuza yikalumuke ngwe ya tumama, mumu kakuhanjika ni shino, nikulengumuka, ni kaleleso wa kulimika ni akwa ululi.

¹⁹ Utu we walumbama, uze hiwatulikila waze akukuvwila woma. Wenawo hiwalingila atu aze aswama muli yena kumeso ja ana ja atu.

²⁰ Muasweka mu chiswamo kumeso je, kuchina punga ya atu. Muasweka ku tenga mu mbalaka ye, kuchina kulitachika cha malimi.

²¹ Yehova akafumane, mumu hangulweza utu wa zango lienyi lia kukomwesa, mu limbo lia tachi.

²² Alioze yami, ami nalipupwishile, ngwami, Hangupatula ngwe kumeso je. Chipwe chocho wevwile liji lia kulemba chami muze natetele kuli yena.

²³ Zangenu Yehova, enu asandu jenyi eswe; Yehova kakufunga waze akushishika; kakufwetesa chikolo yoze wakulinga ni kulengumuka.

²⁴ Takamenu, mbunge jenu jihamuke, enu eswe nwakutatatata kuli Yehova.