Miaso (Masamu) 28 - MUKANDA USANDU WA ZAMBI 1975

¹ Kuli yena Yehova mungutambika. Yena liwe liami kanda ungupangula; kuchina nyi yena munguhola mungwalumuka ngwe waze akupalumukina ku mbongo.

² Ivwa liji lia kuliumba chami muze mungutambika kuli yena, muze mungwolola moko jami ku chiswamo che chisandu.

³ Kanda ungukoka hamwe ni yingulungulu ni waze akulinga uhenge; waze akuhanjika ya sambukila kuli akwo alioze uhuka watwama mu mbunge jo.

⁴ Uafwetese nikulita ni yitanga yo ni ungulungulu wa yilinga yo. Hana kuli ayo nikulita ni yitanga ya moko jo; ukaononone ni chize chinate.

⁵ Mumu o kapalile yitanga ya Yehova, chipwe yilinga ya moko jenyi, kashika iye maapuzula, kechi kwatunga.

⁶ Yehova afumane mumu hevwa liji lia kuliumba chami.

⁷ Yehova iye tachi jami ni lukepwe wami. Mbunge yami kuyamufuliela; kangukwasa. Kashika mbunge yami yinawahilila chikolo, mungumunalisa ni mwaso wami.

⁸ Yehova iye tachi jo; iye mbonge ya ulamwino kuli yoze hanamuwayisa ni maji.

⁹ Lamwina kama atu je; wahisa chihinga che. Ualise nawa, uazundule ndo ku miaka ya mutolo. Samu lia David.