Miaso (Masamu) 27 - MUKANDA USANDU WA ZAMBI 1975

Samu lia David.

¹ Yehova iye pangu liami ni ulamwino wami. Iya mungumuvwila woma? Yehova iye tachi ja mwono wami. Iya mungumuvwila woma?

² Muze akwa yitanga yipi anguwanyine akalie musunya wami, chipwe akwa kulimika ni yami ni akwa kole jami atalingile nikulimbuka.

³ Chipwe yizavu ya tujita manguseleka ni mbalaka jo, mbunge yami kuyichi kwivwa woma. Chipwe jita muyingusangumukina, hindu mungujikiza.

⁴ Chuma chimuwika hineta kuli Yehova, chenacho mungufupa; hanga ngukatwame mu zuwo lia Yehova miaka yeswe ya mwono wami. Ngukamone upeme wa Yehova, ngukazewule tembele yenyi.

⁵ Ha tangwa lia lamba mangusweka mu mbalaka yenyi, mwe muchima lia tabernakulu yenyi mangusweka. Kumanguzundula helu ha liwe.

⁶ Haliapwila kumazundula mutwe wami helu lia akwa kole jami a kungujingilika. Mungutambula yitapo ya uwahililo mu tabernakulu yenyi. Mungwimba, ewa mungwimbita Yehova uhaliso.

⁷ Ungwivwe, yena Yehova, muze munguteta ni liji liami. Nguvwile kama vumbi, ungukumbulule.

⁸ Muze wambile ngwe, Fupa meso jami, mbunge yami yakumbulwile ngwami, Meso je mungufupa, Yehova.

⁹ Kanda unguswekela meso je; Kanda unguchinda yami kavumbi ke mu utenu we. Yena wapwa chikwashi chami; kanda ungumbila, kanda ungwehuka, yena Zambi ya ulamwino wami.

¹⁰ Mumu chipwe tata ni mama mangwehuka, Yehova mangutambula.

¹¹ Ngulongese jita ye, Yehova; ngusongwele kama mu jita yize yasalama, mumu hali akwa kole jami.

¹² Kanda ungukunjika ku upale wa waze akulimika ni yami, mumu yilamikiji hanangukatukila, hamwe ni akwa kuhwilijela ni uswi.

¹³ Nyi kachi chafulielele kumona utu wa Yehova mu chifuchi cha akwa mwono, mba?

¹⁴ Twaminyina Yehova! Takama, mbunge ye yikajikize. Ewa, twaminyina Yehova. Samu lia David.