Miaso (Masamu) 26 - MUKANDA USANDU WA ZAMBI 1975

Samu lia David.

¹ Ngupatwile yena Yehova, mumu kunenda mu kutuwika cha mbunge yami; kunafuliela nawa Yehova nikuyambashana ka.

² Yehova ungusopele kama, ungweseke; eseka manyonga jami ni mbunge yami.

³ Mumu utu wa zango lie kumeso jami uli, ni yami kunenda mu umwenemwene we.

⁴ Chatwamine hamwe ni atu amokomoko; chipwe akwa kalimbalimba chichi kulifutula no.

⁵ Chikungulwila cha akwa yitanga yipi na-kuchivwila kole; chichi kutwama ni yingulungulu.

⁶ Mungusanyisa moko jami nikusamba; chocho mungujinga ku chilumbilo cha yena Yehova;

⁷ Hanga ngukatuhwise liji lia kusakwila, ngukumbulule yitanga ye yeswe ya kukomwesa.

⁸ Yehova kunazanga zuwo lie kutwamamo, kuze kwatwama ulemu we.

⁹ Kanda ufutula mbunge yami hamwe ni akwa shili chipwe mwono wami kanda uufutula ni akwa kumwanga manyinga.

¹⁰ Mu moko jo mwatwama uhuka, kwoko lio lia chindume Hazala ni mbongo ja unjiliji.

¹¹ Alioze yami, mungwenda mu kutuwika chami. Ungukule kama, unguvwile kama vumbi.

¹² Chiliato chami chinamana haze hasalama. Mu yikungulwila mungufumanyisa Yehova.