Miaso (Masamu) 25 - MUKANDA USANDU WA ZAMBI 1975

¹ Kuli yena, Yehova, nakuhetula mbunge yami.

² Muli yena, Zambi yami, kunafuliela, kanda ungukolesa sonyi; kanda utayiza akwa kole jami kungukumba.

³ Hakachi ka waze akutalatala kuli yena niumwe mevwa sonyi, alioze kumevwa sonyi waze akulinga ni mafwefwe, chikuma keshi nacho.

⁴ Ngulweze majila je Yehova; ngulongese yikoka ye.

⁵ Ngusongwele mu umwenemwene we, ungulongese; mumu yena uli Zambi ya ulamwino wami, kuli yena nakutatatata tangwa lieswe.

⁶ Yehova, iwuluka keke ye, ni utu wa zango lie, mumu hihapwa chize ku shakulu.

⁷ Kanda wiwuluka kama milonga ya ukweze wami, hanji uvulumunyi wami. Nikulita ni utu wa zango lie ungwiwuluke kama, mumu ha upeme we, Yehova.

⁸ Yehova iye mupema kanda mukwa ululi, kashika mafumba yivulumunyi mu jila.

⁹ Yihomboloji maasongwela mu upatwilo; malongesa yihomboloji jila yenyi.

¹⁰ Majila eswe a Yehova utu wa zango ni umwenemwene kuli waze akufunga usendo wenyi ni Shindakenyo yenyi.

¹¹ Yehova, mumu ha jina lie ngukonekene kama uhenge wami, mumu hiwoka chikolo.

¹² Mutu yoze wakuvwila woma Yehova iya? Mwenawo mamulongesa jila yize mayitongola.

¹³ Mbunge yenyi muyitwama ni uhwimino, ni munyachi wenyi muuhinga chifuchi.

¹⁴ Usepa wa Yehova uli kuli waze akumuvwila woma; maalweza usendo wenyi.

¹⁵ Meso jami kakutala kuli Yehova matangwa eswe, mumu iye mapulula molu jami ku wanda.

¹⁶ Tewulukila kuli yami unguvwila vumbi, mumu nguli ukawami, ngunayindama.

¹⁷ Lamba lia mbunge yami hilioka; ungupulule kama ku luyinda wami.

¹⁸ Nyonga kama ha yipikalo yami ni yikola yami, ungukonekene kama milonga yami yeswe.

¹⁹ Nyonga hali akwa kole jami, mumu hoka, o kakunguvwila kole yimwe ya uswi.

²⁰ Funga kama mwono wami, ungupulule; kanda ungutayiza kwivwa sonyi, mumu naswama muli yena.

²¹ Kutuwika cha mbunge ni ululi ungufunge, mumu hali yena ngunatatatata.

²² Yena Zambi, kula kama Izalele ku lamba lio lieswe.