Miaso (Masamu) 24 - MUKANDA USANDU WA ZAMBI 1975

¹ Hashi ha mbala ha Yehova, ni yuma yeswe yiliho; ni muno-muze ni aze eswe atwamamo.

² Mumu wahatungile ha kalunga-lwiji; wahakolesele ha masanga a meya.

³ Iya makanduka ha mulundu wa Yehova? Iya mamana muma mwenyi musandu?

⁴ Yoze uli ni moko apema ni mbunge ya kulinanga. Yoze katwalile mbunge yenyi ku yuma yamokomoko; kalishingile ni mahuza.

⁵ Iye kumatambula chiwape kuli Yehova; kumatambula ululi kuli Zambi ya ulamwino wenyi.

⁶ Chino che chisemuko cha akwa kumufupa; waze akufupa meso je, Zambi ya Yakomba.(Litulike.)

⁷ Enu yajilo! hetulenu mitwe yenu, hetukenu enu mapito a mutolo; mba Mwanangana wa ulemu kumanjila.

⁸ Yono Mwanangana wa ulemu iya? Yehova mukolo, mukwa ndundo; Yehova mukwa ndundo mu jita.

⁹ Enu yajilo, hetulenu mitwe, ewa, yihetulenu mapito a mutolo, mba Mwanangana wa ulemu kumanjila.

¹⁰ Yono Mwanangana wa ulemu iya? Yehova-wa-Tujita, iye mwe mwanangana wa ulemu (Litulike.) Samu lia David.