Miaso (Masamu) 22 - MUKANDA USANDU WA ZAMBI 1975

¹ Zambi yami, Zambi yami, kuchi te wangwehuka? Kuchi te uli kusuku ni yami, kwangukwashile, uli kusuku ni maliji jami a mikuma?

² Zambi yami, nakuteta, ha mwalwa, alioze kushi kungukumbulula; nakuteta ha ufuku, chishi kuhola.

³ Alioze yena uli musandu, yena watwama hakachi ka uhaliso wa Izalele.

⁴ Akaka akufulielele. O afulielele ni yena waapulwile.

⁵ Atetele kuli yena, waapulwile. Afulielele muli yena mba kaakolesele sonyi.

⁶ Alioze yami nguli katutu, hi nguli mutu ko. Malunga kakunguchoka, atu kakungulelesa.

⁷ Waze eswe akungumona kakunguseha nikusaula. Kakutuhwisa mivumbo, kakuhunga mitwe ngwo;

⁸ Wafulielele Yehova ngwenyi, Mangupulula. Amupulule se wawahililile muli iye.

⁹ Alioze yena wanguchijile mu jimo. Wakolesele ufulielo wami shimbu te nguchili ku mele ja mama.

¹⁰ Nalimbilile hali yena chize ku jimo; yena uli Zambi yami chize ku jimo lia mama.

¹¹ Kanda umana kusuku ni yami, mumu lamba hakamwihi lili; kukushi yoze makwasa.

¹² Makuji a ngombe anji hanangujingilika. Makuji a tachi a ku Mbashane hananguseleka.

¹³ Kanangupakwila makanwa jo ngwe ndumba nikuwumbula nikuteta.

¹⁴ Hinatehuka ngwe meya. Yifwaha yami yeswe hiyasengunuka. Mbunge yami yapwa ngwe sela, hiyasangunuka muchima lia jimo liami.

¹⁵ Tachi jami jinomu ngwe chipalupalu cha ndeho; limi liami linalamata ku mbangachi jami; kuwanguneha mu fufuta ya kufwa.

¹⁶ Mumu tuwa hanangujingilika. Chikungulwila cha yingulungulu hanangusela. Atuwile moko jami ni yiliato yami.

¹⁷ Yifwaha yami yeswe munguhasa kuyalula, alioze kakungutala, kakunguhulikila meso jo.

¹⁸ Kanalianyina mazalo jami hakachi ko; ha chikuto chami kanate chela.

¹⁹ Yehova, kanda umana kusuku; yena mukwa kungupulula, tambuka kama kungukwasa.

²⁰ Pulula kama mbunge yami ku katana; pulula kama yoze ngunamuzange chikolo ku ndundo ja tuwa.

²¹ Ngulamwine ku kanwa lia ndumba, ewa, ku mbinga ja mbau hiwangukumbulula.

²² Mungwambujola jina lie kuli mandumbu jami. Hakachi ka chikungulwila mungukuhalisa.

²³ Yenu eswe nwakuvwila woma Yehova muhalisenu; yenu eswe munyachi wa Yakomba muchichimiekenu; muvwilenu woma yenu eswe munyachi wa Izalele.

²⁴ Mumu iye kalelesele lamba lia akwa luyinda, chipwe kalivwilile kupiha. Kamuswekele meso jenyi, alioze muze atetele wamuvwile.

²⁵ Kuli yena kunakatuka uhaliso wami mu chikungulwila chinene, mungufweta yilakenyo yami kumeso ja waze akumuvwila woma.

²⁶ Yimbovu kumalia nikukuta; waze akufupa Yehova mamuhalisa; mbunge ye yitwame ni mwono ku miaka ya mutolo.

²⁷ Masongo eswe a hashi kwaewuluka, kumatewulukila kuli Yehova; minyachi yeswe ya mavungu kumawayila kumeso je.

²⁸ Mumu wanganana wa mbala wa Yehova; iye mukwa kuyula helu lia mavungu.

²⁹ Anene eswe a hashi kumalia, kumawayila. Waze eswe akuya ku fufuta kumahetama kumeso jenyi, chipwe waze kahashile kufunga mwono wo.

³⁰ Munyachi umwe kumamuvumbika, ha kutwala kuli Yehova kumachambulula ku chisemuko chize muchizaho.

³¹ Kumeza nikwambulula ululi wenyi kuli atu aze meza kusemuka, ngwo, Iye wachilingile. Samu lia David.