Miaso (Masamu) 2 - MUKANDA USANDU WA ZAMBI 1975

¹ Kuchi te mavungu analikungulula ni Chizungozungo? Kuchi te e atu kakutaka chuma chamokomoko?

² Mianangana a hashi kakulilonga; akwa kuyula kakutwama punga ya kulimika ni Yehova ni yoze amuwayishile ni maji kuli iye, ngwo,

³ Tupatulenu makana jo; tumbilenu mihipu yo!

⁴ Yoze watwama mu malilu kumakaseha, mwe Mwene kumakaayunga.

⁵ Mba kumahanjika kuli ayo ni utenu wenyi; ni ufwatulo wenyi kumaapinjisa.

⁶ Hindu yami hingunawayisa ni maji mwanangana wami ha Zaione, we mulundu wami lisandu.

⁷ Kumungwambulula ye shimbi: Yehova hanambe kuli yami ngwenyi, Yena uli mwanami; tangwa lino hinakusema.

⁸ Eta kuli yami mba mungukwaha mavungu ha chihinga; mungukwaha masongo a hashi ukaapite.

⁹ Kumukaamakuna ni lukanda wa utale, kumukaashiha tuyipinji ngwe sapa ya tengi.

¹⁰ Kashika, enu mianangana, kanyamenu. Yenu ngaji a hashi, lilongesenu mana.

¹¹ Vumbikenu Yehova ni woma. Wahililenu nikuchikima.

¹² Mbejenu mwe Mwana, kuchina matenuka mba munukuwa mu jila, mumu utenu wenyi muusasaminya washi. Kawaha waze eswe akuswama muli iye. Samu lia David muze achinyine kumeso ja mwanenyi Absalome.