Miaso (Masamu) 19 - MUKANDA USANDU WA ZAMBI 1975

¹ Malilu kakwambujola ulemu wa Zambi. Che kuzazuluka cha mwilu chakulweza utotombo wenyi.

² Tangwa ha tangwa kuliakuhanjika; ufuku ha ufuku kuwakulweza mana.

³ Kuhanjika chakuhi, chipwe limi. Liji lio keshi kulivwa.

⁴ Njiza yo yinatuhuka hashi heswe. Maliji jo hanahete ku masongo a hashi. Mwenamo hasela zuwo lia tangwa.

⁵ Iye kapwa ngwe sandungi ha kutuhuka mu zuwo lienyi. Kanawahilila ngwe chitakame yoze mazomboka mu jila yenyi.

⁶ Kuvumbuka chenyi chaputuka ku songo lia lilu. Kujinga chenyi chakuheta ku masongo jalio. Nichimwe chuma chakuswama ku chivukuminya chenyi.

⁷ Shimbi ya Yehova yingunu; yakuhuzulula mbunge. Shindakenyo ya Yehova kuyakola, yakukanyamisa yizuzuke.

⁸ Longeso lia Yehova liamwenemwene, liakuwahisa mbunge. Shimbi ya Yehova yakulinanga, yakupangulwisa meso.

⁹ Woma wa Yehova upema, kuwakulinduluka ku miaka ya mutolo. Upatwilo wa Yehova wamwenemwene, weswe wa ululi.

¹⁰ Shinaho kuyizanga kuhiana oru, ewa, chipwe oru yinji yipema. Yahiana kuyema, chipwe wuchi uze muusotwoka ku chishila, kunyima.

¹¹ Kavumbi ke kakumutoweza nayo. Ha kuyilinga kuchili kwononona chinene.

¹² Iya manyingika kupianguka chenyi? Ngupemese kama ku tupalia twa kusweka.

¹³ Chinda kama kavumbi ke ku milonga ya kulengumuka; kanda yinguzeyesa. Chocho mungupwa mungunu, chichi kuvulumuna mulonga unene.

¹⁴ Maliji a mu kanwa liami, ni kupukuna cha mbunge yami chikapeme kumeso je, yena Yehova liwe liami, kanda Mukwa-Kungukula. Kuli Njimba mukwa lutwe. Samu lia David.