Miaso (Masamu) 18 - MUKANDA USANDU WA ZAMBI 1975

¹ Nakuzanga Yehova, yena tachi jami.

² Yehova iye liwe liami, ni mbonge yami, ni mukwa kungupulula; Zambi yami ni liwe liami lia tachi, muli iye munguswama. Iye lukepwe wami, ni mbinga ya ulamwino wami, ni kaposhi kami musuku.

³ Mungutambika hali Yehova, yoze watela uhaliso. Chocho mangulamwina kuli akwa kole jami.

⁴ Mihipu ya kufwa yangulimbile. Masanga a ungandangali angukolesele woma.

⁵ Mihipu ya Shiole yanguswikile. Makambwila a kufwa anguwanyine.

⁶ Mu luyinda wami natambikile Yehova, natetele kuli Zambi yami. Mu tembele yenyi wevwile liji liami; muteto wami wahetele kuli iye, mwe mu matwi jenyi.

⁷ Haze hene hashi hanyikine nikuchikima, fundamentu ja milundu nawa jachikimine, janyikine mumu iye hanatenuka.

⁸ Mwishi wakatukile ku mazulu jenyi, kahia ka ku kanwa lienyi kalesele, kakuyila ni makala a kahia.

⁹ Wahetamishine malilu nawa, wahulumukine. Kushi lia yiliato yenyi kwapwile milima pwi.

¹⁰ Watambukile ha kerupimi, wahumukine. Ewa wahumukine chikolo ha mapulwa ja fuji.

¹¹ Watengele milima ngwe chiswamo chenyi, ngwe mbalaka yenyi; kulá cha meya; malelwa a pwi mwilu.

¹² Ku kupeyima cha kumeso jenyi malelwa jenyi alá apalikile, ni chiwe ni makala a kahia.

¹³ Yehova wakulungujile nawa mwilu, Mwe Chitunda wahanjikile liji lienyi; chiwe ni makala a kahia.

¹⁴ Watumine mivu yenyi, waamwangine; ewa wahenyesene mihenyo yinji, waakumbile.

¹⁵ Mba ha mashima ja meya hasolokele, fundamentu ja hashi jafukukile ha kwámbila cha yena Yehova, ha kakundukundu ka mwiku wa mu mazulu je.

¹⁶ Watumishine kwilu, wangwanjile, wanguzambwile mu meya anji.

¹⁷ Wangupulwile kuli mukwa kole yami wa tachi. Wangupulwile kuli waze anguvwilile kole mumu angukumbile naye ni ngolo.

¹⁸ Ha tangwa lia luyinda wami angulundumukinyine, alioze Yehova wapwile ujikijilo wami.

¹⁹ Wangutuhwishile ndo ku chihela chinene nawa. Wangupulwile mumu wawahililile muli yami.

²⁰ Yehova wangwononwene nikulita ni ululi wami; wangufwetele nikulita ni kupema cha moko jami.

²¹ Mumu hingunafungu majila ja Yehova, chehukile Zambi yami ni ungulungulu.

²² Mumu upatwilo wenyi weswe wapwile kumeso jami, chambilile yiyulo yenyi.

²³ Napwile mungunu nawa kumeso jenyi, nalifungile ku uhenge wami.

²⁴ Kashika Yehova hanangufwete nikulita ni ululi wami, nikulita ni kupema cha moko jami kumeso jenyi.

²⁵ Kuli akwa keke yena kumulisolola uli mukwa keke. Kuli angunu kumulisolola uli mungunu.

²⁶ Kuli akwa kulinanga kumulisolola uli mukwa kulinanga. Kuli akwa kupiya kumulisolola uli mukwa kulitachika.

²⁷ Mumu kumulamwina akwa luyinda, alioze meso a kulizelula kumukaahombwesa.

²⁸ Kumuwika ndeya yami; Yehova Zambi yami kumapangulula milima yami.

²⁹ Ku tachi je nakupalika ndusu mu mbunga ya tujita. Ku tachi ja Zambi yami nakutumbuka chipanga.

³⁰ Ha kutwala kuli Zambi, jila yenyi yingunu. Liji lia Yehova lia kweseka kulu. Iye lukepwe wa waze aswama muli iye.

³¹ Mumu Zambi iya? Shina Yehova wika. Lie liwe iya? Shina Zambi yetu.

³² Zambi yoze wakungujichika muya wa tachi, kakululamisa jila yami.

³³ Kakupwisa molu jami ngwe molu ja kai. Kangumanyisa ha milundu yami.

³⁴ Kakulongesa moko jami kwasa jita, chocho moko jami kakunana uta wa unengu.

³⁵ Hiwangwaha lukepwe wa ulamwino we, kwoko lie lia chindume hiliangujikijisa, umbovu we hiwangunangamisa.

³⁶ Hiwatohesa shimbo jami kushi lia yami, yiliato yami kuyasenunukine.

³⁷ Mungukaula akwa kole jami, mungwawana, chichi kuhiluka kunyima ndo hanakuwu.

³⁸ Mungwatuwa ndusu, kechi kuhasa kuhinduka. Kumalimbuka kushi lia yiliato yami.

³⁹ Mumu hiwangujichika muya wa tachi ja kwasa jita. Hiwanguhombwesela waze angukatukilile.

⁴⁰ Hiwatewulwisa manyima ja akwa kole jami, hanga ngukonwone waze akunguvwila kole.

⁴¹ Atetele alioze wakuhi chilamwina niumwe. Chipwe kuli Yehova atetele alioze kaakumbulwile.

⁴² Mba naafwenyene ngwe fufuta yize fuji muyihehula. Naambilile haze ngwe malowa ha tapalo.

⁴³ Wangupulwile ku kulitachika cha atu. Hiwangupwisa ngwe mutwe wa mavungu. Vungu limwe chaanyingikine kumanguvumbika.

⁴⁴ Cheswe mevwa liji mangwononokena. Yilambala manguzeyela.

⁴⁵ Yilambala kumakalela; kumatuhuka mu yiswamo yo nikuchikima.

⁴⁶ Yehova katwama ni mwono; liwe liami, afumane. Zambi ya ulamwino wami anangame.

⁴⁷ Iye mwe Zambi yoze wakungukala, kakuzeyesa mavungu kuli yami.

⁴⁸ Kakungupulula kuli akwa kole jami; ewa, kakunguzundula helu lia waze akungukatukila. Kuwakungupulula kuli mukwa kupupa.

⁴⁹ Kashika mungusakwila kuli yena Yehova hakachi ka mavungu. Mungwimbila uhaliso ku jina lie.

⁵⁰ Iye kakuhana ulamwino unene kuli mwanangana wenyi; kakusolola utu wa zango lienyi kuli yoze hamuwayisa; kuli David ni ku munyachi wenyi ku miaka ya mutolo. Kuli Njimba mukwa lutwe. Samu lia David.