Miaso (Masamu) 17 - MUKANDA USANDU WA ZAMBI 1975

¹ Ivwa kama chize Chinalulama, Yehova; panjika kama ku muteto wami. Ivwa kama kulemba chami kuchatuhukile ku mivumbo ya kalimbalimba.

² Upatwilo wami ukatuke kama kumeso je; meso je akamone yuma yize yinalite.

³ Hiuneseka mbunge yami. Hiunahete kuli yami ha ufuku. Hiunangweseka hindu kwawanyine nichimwe. Hinalisela ngwami, Kanwa liami kulichi kuvulumuna.

⁴ Ha kutwala ku yitanga ya atu, ni liji lia ku mivumbo ye hinalifunga ku majila ja chonwonyi.

⁵ Shimbo jami jinalalaminya ku majila je, yiliato yami kuyasenunukine.

⁶ Hinatambika kuli yena mumu yena Zambi mukangukumbulula. Ngwivwe kama, upanjike ku kuhanjika chami.

⁷ Solola kama chikomokeso cha utu wa zango lie; yena mukwa kulamwina ni chindume che waze aswama muli yena kuli akwa kwakatukila.

⁸ Ngufunge kama ngwe katumba ka liso. Ngusweke kushi lia Chizulie cha mapulwa je,

⁹ Kuli yingulungulu aze akungupinjisa, kuli akwa kole jami waze akunguseleka.

¹⁰ Hanajiki mu maji jo. Kakuhanjika nikulengumuka.

¹¹ Hanatuseleka mu ngano jetu. Hanase meso jo mukutunungwina hashi.

¹² Kanapu ngwe ndumba yoze unevu solo lia kulia chinji; ngwe mwevu wa ndumba yoze unatwama muze munajiki.

¹³ Katuka kama Yehova! Umulimune, umunungwine hashi. Pulula kama mbunge yami kuli chingulungulu ni katana ke.

¹⁴ Ngulamwine kuli atu, yena Yehova, ni kwoko lie kuli atu a hano hashi, waze ali ni chihanda cho mu mwono uno. Wakukuchisa majimo jo ni yuma ye yipema ya kusweka. Hanayuku ni ana, kakuhichika upite wo kuli ana jo.

¹⁵ Alioze ha kutwala kuli yami, mungumona meso je ni ululi. Kumungukayuka muze mungulaula mu kulifwa cha yena. Kuli Njimba mukwa lutwe. Samu lia David kavumbi ka Yehova. Iye wahanjikile kuli Yehova maliji a mwaso uno ha tangwa lize Yehova wamupulwile ku moko ja akwa kole jenyi eswe ni ku kwoko lia Saulu: ngwenyi,