Miaso (Masamu) 16 - MUKANDA USANDU WA ZAMBI 1975

¹ Zambi ungufunge mumu naswama muli yena.

² Hinamba kuli Yehova ngwami, Yena uli Mwene wami, chishi ni yuma yipema shina muli yena.

³ Kuli asandu a hano hashi, waze ahiana kupema, muli ayo hiwamba ngwe, Ngunawahilila kanawa.

⁴ Yinyengo ya waze akukaula mazambi akwo muyoka. Chichi kulambula milambu yo ya manyinga, majina jo chichi kuvuluka ha mivumbo yami.

⁵ Yehova iye chihanda chami cha chihinga ni cha musenge wami. Yena kuwakufunga chihanda chami.

⁶ Manjiza hanaholokela kuli yami ha mihela yipema, ewa, chihinga chipema nguli nacho.

⁷ Mungusakwilila Yehova, yoze hanangulongesa mana: chipwe ha ufuku mbunge yami kuyakungufumba.

⁸ Hingunasela Yehova kumeso jami matangwa eswe. Chichi kakokoloka mumu iye kanamana ku chindume chami.

⁹ Kashika mbunge yami kuyinevu chiseke, ni ulemu wami kuunawahilila. Musunya wami nawa muutwama ni Ufulielo ngú.

¹⁰ Mumu kuchi kuhichika mwono wami mu Shiole. Mwe musandu we kuchi kumutayiza kumona kupola.

¹¹ Mukangulweza ye jila ya mwono. Kumeso je kwatwama chiseke cheswe. Ku chindume che kwatwama yiwape ya mutolo. Kulemba cha David.