Miaso (Masamu) 148 - MUKANDA USANDU WA ZAMBI 1975

¹ Halisenu Yehova! Halisenu Yehova mwilu. Muhalisenu ha milundu.

² Muhalisenu yenu angelo jenyi eswe. Muhalisenu yenu chihuji chenyi cheswe.

³ Enu tangwa ni kakweji, muhalisenu. Enu matongonoshi eswe a pangu, muhalisenu.

⁴ Muhalisenu enu malilu a malilu, ni yenu meya nwatwama helu lia malilu!

⁵ Yikahalise jina lia Yehova mumu iye wambile mba yatangiwile.

⁶ Iye nawa wayikolesele ndo ku miaka yeswe ya mutolo. Wasele shimbi yize kuyichi kuhwa.

⁷ Halisenu Yehova hashi, enu tushitu anene a mu kalunga-lwiji, ni ma jinga eswe.

⁸ Ni kahia, ni chiwe, ni neve, ni mbundu, ni kangonga ka fuji, yeswe nwakumanununa liji lienyi.

⁹ Ni milundu ni mindundena, ni mitondo ya mihuko, ni misedru yeswe.

¹⁰ Ni tushitu, ni yimuna, ni tututu a kukalala, ni tujila a kuhumuka.

¹¹ Ni mianangana eswe a hashi ni atu eswe, ni yilolo, ni ngaji eswe a hashi.

¹² Ni akweze ni ana-mapwo, ni makulwana ja malunga, ni ana.

¹³ Akahalise jina lia Yehova, mumu jina lienyi hanangama ukawalio, uhenya wenyi waya helu lia hashi ni lilu.

¹⁴ Iye hanazundula mbinga ya atu jenyi, ni uhaliso wa asandu jenyi eswe; e ana a Izalele, atu aze atwama hehi nenyi. Halisenu Yehova!