Miaso (Masamu) 147 - MUKANDA USANDU WA ZAMBI 1975

¹ Halisenu Yehova! Mumu Chinapeme kwimbila uhaliso Zambi yetu, mumu chinawaha, chinalite.

² Yehova kakutunga Yerusaleme. Kakukungulula waze amwanganyine a kuli Izalele.

³ Kakuwuka waze anafu mbunge. Kakujichika yilonda yo.

⁴ Kakwalula matongonoshi. Kakwaluka eswe majina jo.

⁵ Mwene wetu iye munene; katakama mu ndundo. Mana jenyi keshi ni haze anasulila.

⁶ Yehova kakujikijisa yimbovu. Yingulungulu kakwalimbula hashi.

⁷ Embilenu Yehova nikusakwila. Imbenu uhaliso ha kalialia kuli Zambi yetu.

⁸ Yoze wakufuka mwilu ni malelwa. Yoze wakululikila vula hashi. Yoze wakusokesa mwambu ha milundu.

⁹ Kakuhana kulia kuli tushitu, ni kuli ana ja yikwakwalo muze mateta.

¹⁰ Keshi kuwahilila mu tachi ja kavwalu. Keshi kuvwila kuwaha nichimwe mu molu ja mutu.

¹¹ Yehova kakuwahilila muli waze akumuvwila woma, ni muli waze akutalatala ku keke yenyi.

¹² Yerusaleme, halisa Yehova. Zaione halisa Zambi ye.

¹³ Mumu hanakolesa kwachiliji ja mapito je. Hanawahisa ana je muli yena.

¹⁴ Hapwisa sambukila mu manjiza je. Hanakuzalisa ni tiliku yize yahiana kupema.

¹⁵ Kakutuma shimbi yenyi hashi. Liji lienyi Kakutambuka.

¹⁶ Kakuhana neve ngwe wanda. Kakumwanga mbundu ya chishika ngwe uto.

¹⁷ Kakumbila chiwe ngwe yifwenyufwenyu. Iya mahasa kujikiza mu chishika chenyi?

¹⁸ Kakutuma liji lienyi akayisangunune. Kakuhehula fuji yenyi, mba meya mapukuka.

¹⁹ Kakulweza liji lienyi kuli Yakomba, ni yiyulo yenyi ni upatwilo wenyi kakuyilweza kuli Izalele.

²⁰ Kalingile chocho ku vungu nilimwe. Chikwo nawa, ha kutwala ku upatwilo wenyi kaunyingikine. Halisenu Yehova.