Miaso (Masamu) 146 - MUKANDA USANDU WA ZAMBI 1975

¹ Halisenu Yehova! Mbunge yami, halisa Yehova!

² Shimbu nguli ni mwono munguhalisa Yehova. Shimbu nguchiliho mungwimba uhaliso kuli Zambi yami.

³ Kanda ufuliela yilolo, hanji umwe mwana mutu yoze keshi kuhasa kukwasa.

⁴ Mwiku wenyi wamukatuka, mahilukila ku mavu jenyi. Tangwa lio liene manyonga jenyi majimuka.

⁵ Kawaha yoze uli ni Zambi ya Yakomba kumukwasa; kutalatala chenyi chili muli Yehova Zambi yenyi,

⁶ Yoze watangile lilu ni hashi, ni kalunga-lwiji, ni yize yeswe yilimo. Yoze wakufunga umwenemwene ku miaka ya mutolo.

⁷ Yoze wakupatwila akwa luyinda. Yoze wakuhana kulia kuli akwa zala. Yehova kakutusula funge.

⁸ Yehova kakulawisa meso ja tupuputa. Yehova kakuhetula akwa kufumbama. Yehova kakuzanga akwa ululi.

⁹ Yehova kakufunga njize. Kakujikijisa ana-ashiwa ni tuliwa, alioze jila ya yingulungulu kumakayipwisa yikalu.

¹⁰ Yehova kumakayula ku miaka ya mutolo. Zaione, Zambi ye kumakayula ku yisemuko yeswe. Halisenu Yehova!