Miaso (Masamu) 145 - MUKANDA USANDU WA ZAMBI 1975

Samu Ha uhaliso. Lia David.

¹ Mungukuchichimieka, ena Zambi yami, mwanangana. Mungufumanyisa jina He ku miaka yeswe ya mutolo.

² Mungukufumanyisa matangwa eswe. Munguhalisa jina He ku miaka yeswe ya mutolo.

³ Yehova iye munene; chatamba kumuhalisa chinji. Unene wenyi keshi kuhasa kuunyingikisa.

⁴ Akwa chisemuko chimuwika makasangalisa yitanga ye kuli akwa chisemuko chikwo. Kumakambulula yitanga ye ya ndundo.

⁵ Mungupukuna ha uhenya wa wanangana we ulemu, ni ha yitanga ye ya kukomwesa.

⁶ Atu kumakahanjika ya ndundo ya yilinga ye ya kukolesa woma. Yami mungwambujola unene we.

⁷ Kumakambulula kwiwuluka cha upeme we unene. Kumakembila ululi we.

⁸ Yehova iye mukwa vumbi kanda mukwa keke. Keshi kutenuka kawashi. Utu wa zango lienyi unene.

⁹ Yehova iye mupema kuli eswe. Keke yenyi yinene yahiana yitanga yenyi yeswe.

¹⁰ Yehova, yitanga ye yeswe muyikusakwilila. Asandu je kumakufumanyisa.

¹¹ Kumakambulula ulemu wa wanangana we. Kumahanjika ya ngolo je,

¹² Akalweze kuli ana ja atu yilinga yenyi ya ndundo, ni uhenya wa ulamba wa wanangana wenyi.

¹³ Wanangana we wapwa wa mutolo. Chiyulo che chalinduluka ku yisemuko yeswe.

¹⁴ Yehova kakujikijisa waze eswe akulimbuka. Kakuhetula waze eswe anafumbama.

¹⁵ Meso ja atu eswe akutalatala yena, mba yena wakwaaha kulia cho ha mwaka wacho.

¹⁶ Wakufukula kwoko lie nikuyikisa usona wa waze eswe atwama ni mwono.

¹⁷ Yehova kapwa mukwa ululi mu majila jenyi eswe. Mu yitanga yenyi yeswe vumbi akwete.

¹⁸ Yehova hakamwihi ali ni waze eswe aku-tambika kuli iye; waze eswe akutambika kuli iye mu umwenemwene.

¹⁹ Kumakayukisa usona wa waze akumuvwila woma. Kumakevwa muteto wo nawa, kumakaalamwina.

²⁰ Yehova kakufunga waze eswe akumuzanga, alioze yingulungulu kumakaonwona.

²¹ Kanwa liami mulikahanjika uhaliso wa Yehova. Musunya weswe ukafumanyise jina lienyi lisandu ku miaka yeswe ya mutolo.