Miaso (Masamu) 144 - MUKANDA USANDU WA ZAMBI 1975

¹ Yehova liwe liami afumane, yoze wakulongesa moko jami kwasa jita, ni minwe yami kulitachika.

² Iye utu wa zango kuli yami. Iye mbonge yami, kanda kaposhi kami musuku, kanda mukwa kungupulula. Iye lukepwe wami, yoze ngunamufuliela, yoze wakuzeyesa atu jami kushi liami.

³ Yehova, mutu kuchi apwa wakumunyonga? Mwana mutu kuchi apwa wakumupala?

⁴ Mutu wapwa ngwe mwiku. Matangwa jenyi kapwa ngwe Chizulie chize muchipalika.

⁵ Yehova, hetamisa malilu wize hashi. Sunga ha milundu yikatuhwise mwishi.

⁶ Tuhwisa mihenyo ukaamwange. Tumisa mivu ye ukaamwese lamba.

⁷ Olola kwoko lie kwilu ungulamwine, ungupulule ku meya asuku ni ku kwoko lia yilambala.

⁸ Waze makanwa jo akuhanjika yuma yamokomoko. Kwoko lio lia chindume Hapwa kwoko lia mahuza.

⁹ Zambi, mungukwimbila mwaso waha. Ha kalialia wa kumi lia kusa mungukwimbila uhaliso.

¹⁰ Iye kakuhana ulamwino kuli mianangana. Iye kakupulula kavumbi kenyi David ku katana wa kulemeka.

¹¹ Ungulamwine, ungupulule ku kwoko lia yilambala, waze makanwa jo akuhanjika yuma yamokomoko, ni kwoko lio lia chindume Hapwa kwoko Ha mahuza.

¹² Ana jetu a malunga apwe ngwe yiputa, asuhe mu ukweze wo, ni ana jetu a mapwo apwe ngwe mawe a ha mbango, aze akupula ngwe a kusa ku zuwo Ha mwanangana.

¹³ Machila jetu azale tò, tukatambulemo ya kulia yeka ni yeka. Mapanga jetu akaseme tununu ni kumi Ha tununu mu kelo jetu.

¹⁴ Ngombe jetu akapwe no yiteli yinene, ni kupupa chakuhi ni kutuhuka chakuhi, ni muteto wakuhi mu matapalo jetu.

¹⁵ Kawaha e atu apwa chocho. Ewa kawaha atu aze akwete Zambi yo Yehova.