Miaso (Masamu) 140 - MUKANDA USANDU WA ZAMBI 1975

Kuli Njimba mukwa lutwe. Samu lia David.

¹ Yehova, ungupulule kama kuli mutu mupi. Ngufunge kama kuli mukwa upupilo,

² waze akutaka uhuka mu mbunge jo. Kakulikungulula matangwa eswe ha jita.

³ Hanahele limi lio ngwe kapela. Utende wa fwiji watwama kushi lia mivumbo yo.(Litulike.)

⁴ Yehova, ungufunge kama ku moko ja yingulungulu. Ungufunge kama kuli mukwa upupilo, waze hanahale kupiangula shimbo jami.

⁵ Akwa kulengumuka hananguswekela kambwila, ni ngoji. Hanatanjilika wanda ku sesa lia jila. Hanangutela miheto.(Litulike.)

⁶ Nambile kuli Yehova ngwami, Yena uli Zambi yami. Yehova, panjika kama ku liji lia kulembelela chami.

⁷ Zambi Yehova, yena tachi ja ulamwino wami, hiunangufuku mutwe wami ha tangwa lia jita.

⁸ Yehova, kanda utayiza kuli yingulungulu yize akuzanga. Kanda usenyesa kulutwe kutaka chenyi chipi, kuchina malinangamisa.(Litulike.)

⁹ Ha kutwala ku mitwe ya waze akunguseleka, uhuka wa mivumbo yo ukaajike.

¹⁰ Makala a kahia akaaholokele. Akaambile mu kahia. Akaambile mu mena asuku, kanda akatuka nawa.

¹¹ Yoze ukwete kanwa kechi kakola hano hashi. Chipi muchikahanga mukwa upupilo, chikamulimbule.

¹² Ngunanyingika ngwami, Yehova kumakahakwila mukwa luyinda. Kumakahanjikila chize chinalite ni mukwa kuhona.

¹³ Chamwenemwene akwa ululi kumakasa-kwilila jina lie. Akwa kululama kumakatwama kumeso je.