Miaso (Masamu) 139 - MUKANDA USANDU WA ZAMBI 1975

¹ Yehova, yena hiunapolongoza mu mbunge yami, hiunanguse chinyingi.

² Unanyingika ni kutwama chami ni kukatuka chami. Kunyonga chami kuchakulumbunuka kuli yena chipwe kusuku.

³ Kuwakunyingikisa jila yami ni kupomba chami. Unalijilila ni majila jami eswe.

⁴ Nilimwe liji kulishiho ha limi liami, shina yena Yehova unalinyingika ndusu.

⁵ Kuwanguseleka ni kunyima ni kulutwe. Kwoko lie kuwalisa hali yami.

⁶ Mana apwa haha angukomwesa naye. Asuha, Chahashile kuhetako.

⁷ Kulihi munguchina Spiritu ye? Hanji kulihi munguchina kumeso je?

⁸ Nyi munguzezuka mwilu, yena mwoli. Nyi mungwalila muhela wami mu Shiole, hindu mwoli.

⁹ Nyi mungwanda mapulwa ja chimenemene ngukatwame ku masongo a kalunga-lwiji,

¹⁰ chipwe kuze kwoko lie mulikangusongwela; kwoko lie lia chindume mulikangukwata.

¹¹ Nyi mungwamba ngwami, Chamwenemwene milima muyingufuka, pangu lia kungujingilika likapwe ufuku.

¹² Hindu, chipwe milima kuyichi kungusweka kuli yena, alioze ufuku kuwakupanguluka ngwe mwalwa. Ni milima, ni pangu, yeswe yapwa chimuwika kuli yena.

¹³ Mumu yena walulikile yihanda yami ya muchima, wangutokekele mu jimo lia mama.

¹⁴ Mungukusakwilila mumu chize wangutangile chakukolesa woma, chapwa chikomokeso. Yitanga ye ya kukomwesa. Mbunge yami yinachinyingika pundu.

¹⁵ Muze angutangile ku tenga; muze anguwumbile ni utotombo mushi chikolo lia mavu, yifwaha yami kuyaswamine kuli yena.

¹⁶ Meso je amwene mujimba wami shimbu kanda uliwumba. Mu mukanda we yihanda yami yeswe muyili te ya kusoneka, yize machiyiwumba ha tangwa ha tangwa shimbu te kanda yichipwa.

¹⁷ Zambi, manyonga je kuli yami, cho kulema! Kwafutula hamuwika, cho kwoka!

¹⁸ Kachi nahasa kwaalula mahiana kwalula cha masekeseke. Muze mungulaula, hindu nguli ni yena.

¹⁹ Zambi, kumushiha wate yingulungulu. Kashika yenu eswe nukwete usona wa kumwanga manyinga, katukenu kuli yami.

²⁰ Mumu kakuhanjika cha kulimika ni yena ni ungulungulu. Akwa kole je kakuvulwoka jina lie ngwe liamokomoko.

²¹ Yehova, te chaavwilile kole waze akukuvwila kole yena? Chishi kwivwa kupiha ni waze akukukatukila?

²² Nakwavwila kole yahiana. Nakwanyonga ngwami, Akwa kole jami.

²³ Zambi, hengula muli yami unyingike mbunge yami. Ungweseke, unyingike manyonga jami.

²⁴ Umone kachi muuli ungulungulu umwe muli yami, ungusongwele kama mu jila ya mutolo.