Miaso (Masamu) 137 - MUKANDA USANDU WA ZAMBI 1975

¹ Ku njiji ja Babilonia twatwamine; ewa, twalilile muze twewulukile Zaione.

² Ha misombo yamo twasukikile tulialia twetu.

³ Mumu kwenako waze atutwalile funge atwichile miaso, ni akwa kutupinjisa afupile tusehejele, ngwo, Twimbilenu kama mwaso umwe wa Zaione.

⁴ Ngwe kuchi mutuhasa kwimba mwaso wa Yehova mu chifuchi cha tundaka?

⁵ Nyi mungukuvulama, yena Yerusaleme, ni kwoko liami lia chindume likavulame utotombo walio nawa.

⁶ Limi liami likalamate mu kanwa liami nyi kachi chakwiwulukile, kachi chazangile Yerusaleme kuhiana uwahililo wami uze unene.

⁷ Yehova, iwuluka cha kulimika ni Endome, tangwa lia Yerusaleme, waze ambile ngwo, Puzulenu! Puzulenu! ni ye fundamentu yalio.

⁸ Mwana-pwo Babilonia, ni yena meza ku-kwenyeka. Kumakawaha yoze makufweta ngwe yena watulingile yetu.

⁹ Kumakawaha yoze manda ana je nikwalamba ha liliwe.