Miaso (Masamu) 135 - MUKANDA USANDU WA ZAMBI 1975

¹ Halisenu Yehova! Halisenu jina lia Yehova! Halisenu, yenu tuvumbi twa Yehova.

² Yenu nwakumana mu zuwo lia Yehova, mu yize ya zuwo lia Zambi.

³ Halisenu Yehova, mumu Yehova iye mupema. Embilenu uhaliso jina lienyi, mumu chinawaha.

⁴ Mumu Yehova hanatongola Yakomba akapwe niwenyi. Hanatongola Izalele akapwe upite wa iye mwene wika.

⁵ Mumu ngunanyingika ngwami, Yehova iye munene. Mwene wetu watwama helu lia mazambi eswe.

⁶ Yehova hanalingi cheswacho chamuwahila, ni mwilu, ni hashi, ni mu tulunga-lwiji, ni muma mweswe mwajotoka.

⁷ Kakwandula chishichishi ku masongo a hashi. Katutanga mihenyo ya vula. Kakuchiza fuji ku upite wenyi.

⁸ Iye walambile atangu kusemuka a mu Engitu, ni a atu ni a tushitu.

⁹ Watumine yilayi ni yikomokeso hakachi kenu A-Engitu, ni hali Falau ni hali tuvumbi twenyi eswe.

¹⁰ Walambile mavungu anji. Washihile mianangana a ndundo.

¹¹ Sahone mwanangana wa A-Amore, ni Oge mwanangana wa Mbashane, ni yifuchi yeswe ya mianangana a Kanana.

¹² Wahanyine chifuchi cho chikapwe chihinga; chihinga cha Izalele ni atu jenyi.

¹³ Yehova, jina lie lia mutolo. Yehova, makwiwuluka ndusu ku yisemuko yeswe.

¹⁴ Mumu Yehova mapatwila atu jenyi. Kumakalikonyeka ha kutwala kuli tuvumbi twenyi.

¹⁵ Tuponya twa mavungu twapwa twa prata ni oru, yitanga ya moko ja atu.

¹⁶ Makanwa akwete, alioze keshi kuhanjika. Meso akwete, alioze keshi kumona.

¹⁷ Matwi akwete, alioze keshi kwivwa. Mu makanwa jo kumushi mwiku.

¹⁸ Waze akwalinga kumakalifwa no, ni mweswawo nwafuliela nawa.

¹⁹ Enu akwa munyachi wa Izalele, fumanyisenu Yehova. Enu akwa munyachi wa Arone, fumanyisenu Yehova.

²⁰ Enu akwa munyachi wa Levi, fumanyisenu Yehova. Enu eswe nwakuvwila woma Yehova, fumanyisenu Yehova.

²¹ Yehova afumane mu Zaione, yoze watwama mu Yerusaleme. Halisenu Yehova!