Miaso (Masamu) 132 - MUKANDA USANDU WA ZAMBI 1975

Mwaso wa kukanduka.

¹ Yehova, hali David umwiwulukile lamba lienyi lieswe.

² Chize alishingile kuli Yehova nikulilakenya ni Mukwa-Ndundo wa Yakomba ngwenyi,

³ Chamwenemwene chichi kanjila mu mbalaka ya zuwo liami, chipwe kupomba ha muhela wami,

⁴ chichi kuhana tulo ku meso jami hanji kufungunuka ku yindayizo yami,

⁵ ndo hinawana muma mwa Yehova; tabernakulu ja Mukwa-Ndundo wa Yakomba.

⁶ Twachivwile mu Efrata; twachiwanyine mu munda wa Ngale.

⁷ Mutunjila mu tabernakulu jenyi; mutuwayila ku chitwamo cha yiliato yenyi.

⁸ Katuka, Yehova, ukanjile mu uhwimino we, ni yena ni mushete wa tachi je.

⁹ Asasendote je akatenge ululi mazalo jo. Asandu je akalikwize ni uwahililo.

¹⁰ Mumu hali kavumbi ke David, kanda utewulula meso je kuli yoze wamuwayishile ni maji.

¹¹ Chamwenemwene Yehova hanalishingi kuli David, kechi kutewulukako, ngwenyi, Wa kuli ana a kusema yena, mungusa ha ngunja ye.

¹² Nyi ana je mafunga usendo wami, ni Shindakenyo yami yize mungwalongesa, ana jo nawa kumakatwama ha ngunja ye ku miaka ya mutolo.

¹³ Mumu Yehova hanatongola Zaione. Hanayizange yikapwe mahienyi, ngwenyi,

¹⁴ Kuno kwene mukupwa uhwimino wami wa mutolo. Kuno kwene mungutwama, mumu kunachizanga.

¹⁵ Munguwahisa chikolo kulia chenyi. Mungukuchisa yiswale jenyi ni kulia.

¹⁶ Asasendote jenyi mungwa jika ni ulamwino. Asandu jenyi malikwiza ni uwahililo.

¹⁷ Kwenako mungusokolokesa mbinga ya David. Hingunalulika ndeya hali yoze namuwayishile ni maji.

¹⁸ Akwa kole jenyi mungwajika ni sonyi, alioze hali iye mwene chipangula chenyi muchikahenya.