Miaso (Masamu) 130 - MUKANDA USANDU WA ZAMBI 1975

Mwaso wa kukanduka.

¹ Mu jondo nasanyikine kuli yena Yehova.

² Yehova, ivwa kama liji liami. Matwi je apanjike ku liji lia kuliumba chami.

³ Nyi yena Yehova mufunjika uhenge, Mwene! iye majikiza?

⁴ Alioze ukonekeno ukwete, hanga akuvwile woma.

⁵ Kakutwaminyina Yehova. Mbunge yami yakutwaminyina. Ku liji lienyi nakutalatala.

⁶ Mbunge yami yakutalatala Yehova, kuhiana chize tulayi matalatala kucha; ngwami, Kuhiana chize tulayi matalatala kucha.

⁷ Enu A-Izalele, talatalenu Yehova, mumu kuli Yehova kwatwama utu wa zango. Kuli iye kwatwama ukule wa kulumbama.

⁸ Iye kumakakula Izalele ku uhenge wenyi weswe.