Miaso (Masamu) 129 - MUKANDA USANDU WA ZAMBI 1975

Mwaso wa kukanduka.

¹ Kanji hanangupinjisa chize ku ukweze wami. Izalele ambe haliapwila ngwo,

² Kanji hanangupinjisa chize ku ukweze wami, hindu kangukumbile.

³ Akwa sharua achipile ha nyima yami. Asuhishile mihanga yo.

⁴ Yehova iye mukwa ululi, hanapatula ngwi mihipu ya yingulungulu.

⁵ Waze eswe akuvwila kole Zaione akevwe sonyi akahiluke kunyima.

⁶ Akapwe ngwe mwambu uze wakusoka ha fulumba. Wakulela shimbu kanda uchikola.

⁷ Mukwa kwengo kechi kuhasa kuzalisa nawo kwoko lienyi. Mukwa kukasa yichita kechi kuhasa kuzalisa nawo mu kondo yenyi.

⁸ Chipwe akwa kupalika kechi kwamba ngwo, Uwape wa Yehova ukapwe hali yena; tunakuwahisa mu jina lia Yehova.