Miaso (Masamu) 119 - MUKANDA USANDU WA ZAMBI 1975

¹ Kawaha waze alulama mu jila; waze enda mu shimbi ja Yehova.

² Kawaha waze atunga Shindakenyo jenyi; waze amufupa ni mbunge yeswe.

³ Chipwe uhenge keshi kuulinga; kakwenda mu majila jenyi.

⁴ Hiunatwambe tukafunge ndongo je, nikujimanununa kanawa.

⁵ Nyi kachi te hanakolesa majila jami kufunga yiyulo ye.

⁶ Nyi chocho chichi kwivwa sonyi muze mungulemesa shimbi je jeswe.

⁷ Mungukusakwilila ni kululama cha mbunge muze mungulilongesa upatwilo wa ululi.

⁸ Mungufunga yiyulo. Kanda ungwehuka liakulu. Bete

⁹ Neka mukweze mapemesa jila yenyi? Ha kutalamo kanawa nikulita ni liji lie.

¹⁰ Kunakufupa ni mbunge yami yeswe. Kanda ungutayiza kama kupianguka ku shimbi je.

¹¹ Liji lie kunalisweka mu mbunge yami kuchina mungukuvulumuna.

¹² Yena Yehova kuwawaha! Ngulongese kama yiyulo ye.

¹³ Hinambujola ni mivumbo yami upatwilo weswe wa mu kanwa lie.

¹⁴ Kunawahilila mu jila ya Shindakenyo ye chizechene ngwe munguwahilila mu upite weswe.

¹⁵ Mungupukuna mu ndongo je; mungulemesa majila je.

¹⁶ Munguwahilila mu yiyulo ye. Chichi kuvulama liji lie. Ngimele

¹⁷ Linga kama nikuvungumuna ni yami kavumbi ke hanga ngukatwame ni mwono. Chocho ngukafunge liji lie.

¹⁸ Lawisa kama meso jami hanga ngukamone yuma ya kukomwesa ya mu shimbi je.

¹⁹ Nguli ngeji hano hashi, kanda usweka shimbi je kuli yami.

²⁰ Mbunge yami kuyakupulika mumu ha usona uze ulimo matangwa eswe ha upatwilo we.

²¹ Hiunambila akwa kulengumuka, kanashingiwa; waze akupianguka ku shimbi je.

²² Unguchize kama luchoko ni sau, mumu hingunafungu Shindakenyo je.

²³ Yilolo nawa atwamine nikuhanjika cha kulimika ni yami, alioze yami kavumbi ke napukwine ha yiyulo ye.

²⁴ Shindakenyo je kujapwa chiseke chami kanda jikwa kunguyula. Ndalete

²⁵ Mbunge yami yinalalaminya ku fufuta; nguhuzulule kama yena nikulita ni liji lie.

²⁶ Nambulwile majila jami mba yena wangukumbulwile. Ngulongese kama yiyulo ye.

²⁷ Ngunyingikise jila ya ndongo je, chocho mungupukuna ha yitanga ye ya kukomwesa.

²⁸ Mbunge yami yinasangunuka ni kulema; ututakamise nikulita ni liji lie.

²⁹ Chiza kuli yami jila ya mahuza, ungwehe shimbi ye ni vumbi.

³⁰ Hingunatongola jila ya umwenemwene, hingunase upatwilo we kumeso jami.

³¹ Ngunalalaminya ku Shindakenyo je. Yehova, kanda ungukolesa sonyi.

³² Munguzombokela mu jila ya shimbi je muze yena mutohesa mbunge yami. He

³³ Yehova, ungulongese kama jila ya yiyulo ye, mba munguyifunga ndo ku songo.

³⁴ Ungwehe kama malinjekela, mba mungulunga shimbi ye, ewa, munguyifunga ni mbunge yami yeswe.

³⁵ Ungwendese kama mu jila ya shimbi je, mumu nakuwahililamo.

³⁶ Twala mbunge yami ku Shindakenyo je hi ku kuzo ko.

³⁷ Tewulula kama meso jami, kanda atala yuma yamokomoko, unguhuzulule mu majila je.

³⁸ Kolesa liji lie kuli yami kavumbi ke, yami nakulitumbikila ku woma wa yena.

³⁹ Kondolola kama luchoko yoze akunguchoka nenyi, ngunamuvwila woma, mumu upatwilo we upema.

⁴⁰ Hingunevu usona wa ndongo je, unguhuzulule ni ululi we. Vau

⁴¹ Yehova, utu wa zango lie wize kuli yami, ni ulamwino we nikulita ni liji lie.

⁴² Chocho mungupwa ni kumbululo lia kuhana kuli yoze manguchoka, mumu ngunafuliela liji lie.

⁴³ Kanda uchiza liakulu liji lie mu kanwa liami, mumu najikijila mu upatwilo we.

⁴⁴ Chocho mungufunga shimbi ye matangwa eswe ku miaka ya mutolo.

⁴⁵ Mungwendela muma munene mumu kunafupa ndongo je.

⁴⁶ Munguvuluka Shindakenyo je kumeso ja mianangana nawa; chichi kwivwa sonyi.

⁴⁷ Munguwahilila mu shimbi je jize nazanga.

⁴⁸ Munguzundula moko jami nawa ku shimbi je jize nakuzanga. Mungupukuna ha shimbi je. Zaine

⁴⁹ Iwuluka kama liji lie kuli yami kavumbi ke, lize wanguhele kutalatala.

⁵⁰ Chino chapwa kulembejeka kuli yami mu luyinda wami, mumu liji lie lianguhuzulwile.

⁵¹ Akwa kulengumuka angulenyene chikolo, hindu chapiasukile ku shimbi je.

⁵² Yehova, nakwiwuluka upatwilo we wa shakulu, nakulilembejeka.

⁵³ Utenu wa kusasaminya chikolo hanangukwata mumu hali yingulungulu waze akwehuka shimbi je.

⁵⁴ Yiyulo ye yapwa miaso yami mu zuwo lia ungeji wami.

⁵⁵ Yehova, nakwiwuluka jina lie ha ufuku, nakufunga shimbi je.

⁵⁶ Chino napwa nacho mumu nafungile ndongo je. Chete

⁵⁷ Yehova iye chihanda chami. Hingunambe ngwami, Mungufunga maliji je.

⁵⁸ Nechile vumbi lie ni mbunge yami yeswe; unguvwile kama keke nikulita ni liji lie.

⁵⁹ Nanyongene ha majila jami, natalikishile yiliato yami mu Shindakenyo je.

⁶⁰ Natambukile, chalalukile ha kufunga shimbi je.

⁶¹ Mihipu ya yingulungulu yangulimbile, hindu chavulamine shimbi ye.

⁶² Ha muchima ufuku munguhinduka ngukakusakwilile mumu ha upatwilo we wa ululi.

⁶³ Nguli sepa lia waze eswe akukuvwila woma, ni lia waze akufunga ndongo je.

⁶⁴ Yehova, hashi hazala tò ni utu wa zango lie. Ukangulongese shimbi je. Tete

⁶⁵ Yehova, hiunalingi kanawa ni yami kavumbi ke nikulita ni liji lie.

⁶⁶ Ungulongese upatwilo upema ni mana, mumu kunafuliela shimbi je.

⁶⁷ Shimbu te kanda ungulamba napiasukile, alioze haliapwila nakufunga liji lie.

⁶⁸ Yena uli mupema; wakulinga chipema. Ungulongese yiyulo ye.

⁶⁹ Akwa kulengumuka hangutombela mahuza, alioze mungufunga ndongo je ni mbunge yami yeswe.

⁷⁰ Mbunge jo jatoha ngwe maji, alioze yami nakuwahilila mu shimbi ye.

⁷¹ Chinapeme kuli yami chize wanguyindamishine, hanga ngukalilongese yiyulo ye.

⁷² Shimbi ya mu kanwa lie yanguwahila kuhiana tununu twa oru ni prata. Yote

⁷³ Moko je angutangile nikunguwumba, ungwehe kama mana hanga ngulilongese shimbi je.

⁷⁴ Waze akukuvwila woma mangumona; mawahilila mumu natalatala ku liji lie.

⁷⁵ Yehova, ngunanyingika ngwami, Upatwilo we wapwa wa ululi, chikwo nawa mu umwenemwene we wanguyindamishine.

⁷⁶ Ngunalembe, utu wa zango lie ukapwe wa kungulembejeka, nikulita ni liji lie kuli yami kavumbi ke.

⁷⁷ Keke ye yinene yikeze kuli yami, ngutwame ni mwono, mumu shimbi ye yapwa chiseke chami.

⁷⁸ Akwa kulengumuka akevwe sonyi mumu hangulimbula ni mahuza, hindu mungupukuna ha ndongo je.

⁷⁹ Waze akukuvwila woma akatewulukile kuli yami, mba manyingika Shindakenyo je.

⁸⁰ Mbunge yami yikapwe yingunu mu yiyulo ye, mba chichi kevwa sonyi. Kafe

⁸¹ Mbunge yami kuyafwila ulamwino we, alioze nakutalatala liji lie.

⁸² Meso jami kanafu ha kulawokela liji lie, shimbu ngunambe ngwami, Tangwa lika mukangulembe jeka?

⁸³ Mumu ngunapu ngwe tuku ku mwishi, hindu chishi kuvulama yiyulo ye.

⁸⁴ Matangwa ja yami kavumbi ke angahi? Mwiji muka mupatwila waze akunguhungumiona?

⁸⁵ Akwa kulengumuka hanangufulila mawundu; waze kalitele ni shimbi ye.

⁸⁶ Shimbi je jeswe jamwenemwene. O kakunguhungumiona ni mahuza. Ungukwase kama.

⁸⁷ Ambile kungwonwona muno-muze, hindu chehukile ndongo je.

⁸⁸ Unguhuzulule nikulita ni utu wa zango lie. Chocho mungufunga Shindakenyo ja mu kanwa lie. Lamede

⁸⁹ Yehova, liji lie kuliakola mwilu ku miaka ya mutolo.

⁹⁰ Umwenemwene we kuwapwa ku yisemuko yeswe. Yena wakolesele hashi kashika kuhalinduluka.

⁹¹ Kuyakola musono nikulita ni yiyulo ye, mumu yuma yeswe yapwa tuvumbi twe.

⁹² Nyi kachi shimbi ye kuyapwile uwahililo wami, kachi hinatoka haze hene mu luyinda wami.

⁹³ Chichi kavulama ndongo je nilimwe tangwa hiunanguhuzulula najo.

⁹⁴ Nguli niwe; ungulamwine kama, mumu kunafupa ndongo je.

⁹⁵ Yingulungulu hanangujikinyina akangwonwone, alioze yami munguzewula Shindakenyo je.

⁹⁶ Hingunamono haze ungunu weswe unasulila, alioze shimbi ye yahiana kutoha. Meme

⁹⁷ Shimbi ye kunayizanga chimwe! Yapwa kupukuna chami tangwa lieswe nganganga.

⁹⁸ Shimbi je jakungwaha mana kuhiana akwa kole jami eswe, mumu kujatwama ni yami matangwa eswe.

⁹⁹ Malinjekela nguli no kuhiana alongeshi jami eswe, mumu Shindakenyo je kupukuna chami.

¹⁰⁰ Ngunanyingika yuma kuhiana makulwana, mumu hingunafungu ndongo je.

¹⁰¹ Hingunachinji yiliato yami ku jila yeswe yipi, hanga ngukamanunune liji lie.

¹⁰² Chahambulukile ku upatwilo we, mumu yena wangulongesele.

¹⁰³ Maliji je, cho kuyema ha kwapanjika! Mu kanwa liami kanayeme kuhiana wuchi.

¹⁰⁴ Ku ndongo je nakuzuka mana, kashika nakuvwila lwaji jila yeswe ya mahuza. Nune

¹⁰⁵ Liji lie liapwa ndeya ku yiliato yami kanda lutemo ku jila yami.

¹⁰⁶ Hinalishinga, nachikolesa nawa, ngwami, Mungufunga upatwilo we wa ululi.

¹⁰⁷ Ngunayindama chikolo. Yehova, unguhuzulule nikulita ni liji lie.

¹⁰⁸ Yehova, ngunaliumbu kuli yena, tambula kama milambu ya mbunge ya mu kanwa liami, mba ungulongese upatwilo we.

¹⁰⁹ Mwono wami ngunaukwata mu kwoko liami matangwa eswe, hindu chishi kuvulama shimbi ye.

¹¹⁰ Yingulungulu hanangutela kambwila, hindu chapiangukile ku ndongo je.

¹¹¹ Shindakenyo je hingunatambula ngwe chihinga cha mutolo, mumu japwa uwahilio wa mbunge yami.

¹¹² Hingunase mbunge yami kumanununa yiyulo ye ku miaka ya mutolo, ndusu ndo ku songo. Sameke

¹¹³ Nakuvwila kole akwa mbunge jiali, alioze kunazanga shimbi ye.

¹¹⁴ Yena uli chiswamo chami kanda lukepwe wami. Nakutalatala ku liji lie.

¹¹⁵ Katukenu kuli yami, yenu akwa yitanga yipi, hanga ngukafunge shimbi ja Zambi yami.

¹¹⁶ Ungujikijise kama nikulita ni liji lie, ngukatwame ni mwono. Kanda nguvwila sonyi kutalatala chami.

¹¹⁷ Ungukwachilile kama mba munguwaha, mba mungulemesa yiyulo ye matangwa eswe.

¹¹⁸ Hi unalelesa waze eswe akupianguka ku yiyulo ye, mumu kwonga cho chamokomoko.

¹¹⁹ Wakuhwisa yingulungulu eswe a hano hashi ngwe yinganga, kashika kunazanga Shindakenyo je.

¹²⁰ Musunya wami kuunachikima ni woma wa yena. Woma ngunevu wa upatwilo we. Ayine

¹²¹ Hingunalingi chize chinalite ni ululi. Kanda ungwehuka kuli akwa kunguhungumiona.

¹²² Upwe chifungo cha yipema hali yami kavumbi ke, akwa kulengumuka kanda anguhungumiona.

¹²³ Meso jami hanahu nikutalatala ulamwino we ni liji lie lia ululi.

¹²⁴ Linga ni yami kavumbi ke nikulita ni utu wa zango lie; ungulongese yiyulo ye.

¹²⁵ Yami nguli kavumbi ke, ungwehe kama mana, hanga ngukanyingike Shindakenyo je.

¹²⁶ Mwaka wa Yehova hiweza wa kulinga milimo yenyi, mumu hanatenge shimbi ye yamokomoko.

¹²⁷ Kashika kunazanga shimbi je kuhiana oru, ewa, chipwe oru yipema.

¹²⁸ Kashika ngunamono ndongo je jeswe ja kutwala ku yuma yeswe ngwami, Jinapeme, mba kunavwila lwaji jila yeswe ya mahuza. Pe

¹²⁹ Shindakenyo je kujakukomwesa, kashika mbunge yami kuyakujifunga.

¹³⁰ Kulumbunuka cha maliji je chakuneha pangu. Chakuneha mana kuli chikukumi.

¹³¹ Napakwile kanwa liami; nahwilijelele, mumu ha usona nevwile wa shimbi je.

¹³² Tewulukila kuli yami unguvwile vumbi, ngwe wakulingalinga kuli waze akuzanga jina lie.

¹³³ Kolesa kama shimbo jami mu liji lie. Kanda utayiza uhenge kunguyula.

¹³⁴ Ungukule kama ku yihungumiona ya atu, chocho mungufunga ndongo je.

¹³⁵ Meso je akapanguke kuli yami kavumbi ke, ungulongese yiyulo ye.

¹³⁶ Ku meso jami tuzololo twa meya kakusulumiokena mumu atu keshi kufunga shimbi ye. Zade

¹³⁷ Yena Yehova uli mukwa ululi, ni upatwilo we nawa kuwalulama.

¹³⁸ Hiunatumu Shindakenyo je ni ululi ni kushishika chahiana.

¹³⁹ Kulinga chami ni mbunge yeswe chinanguli, mumu akwa kulimika ni yami hanavulama maliji je.

¹⁴⁰ Liji lie liahiana kutoma, kashika yami kavumbi ke kunalizanga.

¹⁴¹ Nguli mukepe kanda nguli mulelu kuli atu, hindu chishi kuvulama ndongo je.

¹⁴² Ululi we kuwapwa wa mutolo. Shimbi ye we umwenemwene.

¹⁴³ Lamba ni mwongo hiyinangukwata, hindu shimbi je japwa chiseke chami.

¹⁴⁴ Ululi wa Shindakenyo je kuwapwa wa mutolo Ungwehe mana mba mungutwama ni mwono. Kofe

¹⁴⁵ Hinasanyika ni mbunge yami yeswe; ungukumbulule kama, Yehova. Mungufunga yiyulo ye.

¹⁴⁶ Hingunasanyika kuli yena; ungulamwine kama, mba mungufunga Shindakenyo je.

¹⁴⁷ Naliangile kusanyika shimbu kanda kucha. Nataliletalile maliji je.

¹⁴⁸ Meso jami ahangile ha tulayi twa ufuku, hanga ngukapukune mu liji lie.

¹⁴⁹ Ivwa kama liji liami nikulita ni utu wa zango lie. Yehova, unguhuzulule nikulita ni upatwilo we.

¹⁵⁰ Waze akukaula ungulungulu hanakundama. Kusuku atwama ni shimbi ye.

¹⁵¹ Yena Yehova uli hakamwihi. Shimbi je jeswe kujapwa we umwenemwene.

¹⁵² Kulu nachinyingikine ku Shindakenyo je ngwami, Hiunajikolesa ja mutolo. Lesha

¹⁵³ Tala kama ku luyinda wami, ungupulule kama, mumu chishi kuvulama shimbi ye.

¹⁵⁴ Unguhakwile kama, Ungukule. Unguhuzulule nikulita ni liji lie.

¹⁵⁵ Ulamwino kusuku uli ni yingulungulu, mumu keshi kufupa yiyulo ye.

¹⁵⁶ Yehova, keke ye yinene kuyapwa yinji. Unguhuzulule nikulita ni upatwilo we.

¹⁵⁷ Akwa kunguhungumiona ni akwa kulimika ni yami anji, hindu chambiangukile ku Shindakenyo je.

¹⁵⁸ Namwene akwa mafwefwe; napihilile mumu kafungile liji lie.

¹⁵⁹ Unyonge chize nakuzanga ndongo je; Yehova, unguhuzulule nikulita ni utu wa zango lie.

¹⁶⁰ Liji lie lieswe liapwa umwenemwene. Ululi wa upatwilo we weswe kuwalinduluka wa mutolo. Shine

¹⁶¹ Yilolo hananguhungumiona shili yamokomoko, alioze mbunge yami yakuvwila mwongo maliji je.

¹⁶² Nakuwahililila liji lie, ngwe yoze hawana yikumba yinene.

¹⁶³ Kunavwila lwaji mahuza, alioze shimbi ye kunayizanga.

¹⁶⁴ Kashimbiali ha tangwa nakukuhalisa, mumu ha upatwilo we wa ululi.

¹⁶⁵ Waze akuzanga shimbi ye kuhwima chinji ali nacho. Nichimwe muchiatalingisa chakuhi.

¹⁶⁶ Yehova, kunatalatala ulamwino we, kunamanununa shimbi je.

¹⁶⁷ Mbunge yami kuyafunga Shindakenyo je; kunajizanga kuhiana.

¹⁶⁸ Kunafunga ndongo je ni Shindakenyo je, mumu majila jami eswe kumeso je ali. Tau

¹⁶⁹ Yehova, muteto wami ukahete kuli yena, ungwehe mana nikulita ni liji lie.

¹⁷⁰ Kuliumba chami chikahete kumeso je, ungupulule nikulita ni liji lie.

¹⁷¹ Mivumbo yami yikahanjike uhaliso, mumu wakungulongesa yiyulo ye.

¹⁷² Limi liami likembile liji lie, mumu shimbi je jeswe japwa ululi.

¹⁷³ Kwoko lie lipwe lia kungukwasa, mumu hingunatongola ndongo je.

¹⁷⁴ Yehova, ulamwino we kunauvwila usona. Shimbi ye yapwa uwahililo wami.

¹⁷⁵ Mbunge yami yitwame ni mwono, yikakuhalise. Upatwilo we ukangukwase.

¹⁷⁶ Hingunapiasuka ngwe panga yoze wa-jimbala. Ungufupe kama yami kavumbi ke, mumu chishi kuvulama shimbi je.