Miaso (Masamu) 118 - MUKANDA USANDU WA ZAMBI 1975

¹ Sakwilenu kuli Yehova, mumu iye mupema, mumu utu wa zango lienyi wa mutolo.

² A-Izalele ambe haliapwila ngwo, Utu wa zango lienyi wa mutolo.

³ Akwa jiko lia Arone ambe haliapwila ngwo, Utu wa zango lienyi wa mutolo.

⁴ Akwa kuvwila woma Yehova ambe ngwo, Utu wa zango lienyi wa mutolo.

⁵ Mu luyinda wami natambikile kuli Yehova, mba Yehova yangukumbulula; yangusa mu muhela unene.

⁶ Yehova kwali ku sali lia yami, chichi kwivwa woma. Atu yika mangulinga?

⁷ Yehova kwali ku sali lia yami hakachi ka waze akungukwasa, kashika mungumona chize nazanga hali waze akunguvwila kole.

⁸ Shinaho kuchinyina kuli Yehova, hi kufuliela mutu ko.

⁹ Shinaho kuchinyina kuli Yehova, hi kufuliela yilolo ko.

¹⁰ Mavungu eswe anguselekele. Mu jina lia Yehova naasutwile.

¹¹ Kuseleka anguselekele, mu jina lia Yehova naasutwile.

¹² Anguselekele ngwe puka. Ajimine ngwe kahia ka mingonga. Mu jina lia Yehova naasutwile.

¹³ Enu nwangwashile ni tachi, hanga ngukalimbuke alioze Yehova wangukwashile.

¹⁴ Yehova iye tachi jami ni mwaso wami. Iye hanapu ulamwino wami.

¹⁵ Mu mbalaka ja akwa ululi mwatwama liji lia chiseke ni ulamwino. Kwoko lia chindume lia Yehova kuliakulinga ni tachi.

¹⁶ Kwoko lia chindume lia Yehova hanangama. Kwoko lia chindume lia Yehova kuliakulinga ni tachi.

¹⁷ Chichi kufwa. Mungutwama ni mwono. Mungwambujola yitanga ya Yehova.

¹⁸ Yehova hanangufumbu chikolo, alioze kangukunjikile ku kufwa.

¹⁹ Ungwazulwile yajilo ya ululi, mba mungunjilamo, mungusakwila kuli Yehova.

²⁰ Chino che chikolo cha Yehova. Akwa ululi kumakanjilamo.

²¹ Mungukusakwilila mumu wangukumbulwile. Hiunalumuka ulamwino wami.

²² Liwe lize alitunyine tungi, hilinapu lia helu lia mbango.

²³ Yehova walinga chuma chino. Chapwa chikomokeso kumeso jetu.

²⁴ Lino lie tangwa Yehova walitangile, tuwahililemo ni chiseke.

²⁵ Tunaliumbu Yehova! Utulamwine haliapwila. Yehova tunaliumbu, tuma kama kuwaha.

²⁶ Kawaha yoze uneza mu jina lia Yehova. Hitunakuwahisa mu zuwo lia Yehova.

²⁷ Yehova iye Zambi, hanatwehe pangu. Kasa chitapo ni mihipu chipwe ku mbinga ja chilumbilo.

²⁸ Yena uli Zambi, yami mungukusakwilila. Uli Zambi yami, mungukunangamisa.

²⁹ Sakwililenu kuli Yehova mumu iye mupema, mumu utu wa zango lienyi wa mutolo.