Miaso (Masamu) 116 - MUKANDA USANDU WA ZAMBI 1975

¹ Nazanga Yehova mumu hanapanjika liji liami ni kuliumba chami.

² Mumu hanahetamisa twitwi lienyi kuli yami, kashika mungutambika kuli iye matangwa eswe a mwono wami.

³ Mihipu ya kufwa yangujingile. Yikola ya Shiole yangukwachile. Nawanyine lamba ni chinyengo.

⁴ Mba natambikile ku jina lia Yehova, ngwami, Yehova, ngunaliumbu, pulula kama mwono wami.

⁵ Yehova mukwa vumbi ni ululi; ewa, Zambi yetu mukwa keke.

⁶ Yehova kakufunga yikukumi. Janguhwile alioze iye wangulamwinyine.

⁷ Mbunge yami hiluka ku uhwimino we, mumu Yehova hanakwehe ya kulumbama.

⁸ Mumu hiunapulula mwono wami ku kufwa, ni meso jami ku masoji, ni yiliato yami ku kulimbuka.

⁹ Mungwenda kumeso ja Yehova mu chifuchi cha akwa mwono.

¹⁰ Kafulielele, kashika hingunahanjika; te nayindamine chikolo.

¹¹ Ha kulipupula nambile ngwami, Atu eswe akwa mahuza.

¹² Yika munguhana kuli Yehova ha yiwape yenyi yeswe kuli yami?

¹³ Mungwanda musenge wa ulamwino, mba mungusanyika ha jina lia Yehova.

¹⁴ Mungumanununa yilakenyo yami kuli Yehova, chipwe kumeso ja atu jenyi eswe.

¹⁵ Kufwa cha asandu jenyi chilemu kumeso ja Yehova.

¹⁶ Yehova, chamwenemwene nguli kavumbi ke. Nguli kavumbi ke, mwana wa kavumbi ke wa pwo, hiunakasulula makana jami.

¹⁷ Munguhana kuli yena mulambu wa kusakwila. Mungusanyika ha jina lia Yehova.

¹⁸ Mungumanununa yilakenyo yami kuli Yehova chipwe kumeso ja atu jenyi eswe;

¹⁹ Mu yize ya zuwo lia Yehova, mwe muchima lia yena Yerusaleme. Halisenu Yehova!