Miaso (Masamu) 115 - MUKANDA USANDU WA ZAMBI 1975

¹ Yehova, hi yetu ko, hi yetu ko machichimieka, alioze jina lie linene, mumu ha utu wa zango lie ni umwenemwene we.

² Kuchi te mavungu mamba ngwo, Zambi yo Ulihiye haliapwila?

³ Alioze Zambi yetu mwilu ali. Hanalingi chize chamuwahila.

⁴ Mahamba jo apwa a prata ni oru, chitanga cha moko ja atu.

⁵ Makanwa akwete alioze keshi kuhanjika. Meso akwete alioze keshi kumona.

⁶ Matwi akwete alioze keshi kwivwa. Mazulu akwete alioze keshi kuhumbika.

⁷ Moko akwete alioze keshi kukwatakwata. Molu akwete alioze keshi kwenda. Chipwe kuhanjika keshi kuhanjika mu miliwu yo.

⁸ Waze akwalinga malifwa no, ni mweswawo maafuliela.

⁹ Enu A-Izalele! Fulielenu Yehova, iye chikwashi cho kanda lukepwe wo.

¹⁰ Enu akwa jiko lia Arone fulielenu Yehova, iye chikwashi cho kanda lukepwe wo.

¹¹ Enu eswe nwakuvwila woma Yehova, fulielenu Yehova, iye chikwashi cho kanda lukepwe wo.

¹² Yehova hanatwiwuluka, kumakatuwahisa. Iye kumakawahisa jiko lia Izalele. Kumakawahisa jiko lia Arone.

¹³ Kumakawahisa waze akuvwila woma Yehova; ni akepe ni anene.

¹⁴ Yehova akanwokese nawa ni nawa, yenu ni ana jenu.

¹⁵ Hanuwahisa kuli Yehova yoze watangile mwilu ni hashi.

¹⁶ Malilu o malilu a Yehova, alioze hashi hakunjika kuli ana ja atu.

¹⁷ Afu keshi kuhalisa Yehova, chipwe waze akupalumuka mu ngongwaholela,

¹⁸ Alioze yetu mutufumanyisa Yehova, chize ku tangwa lia musono ndo ku miaka ya mutolo. Halisenu Yehova!