Miaso (Masamu) 114 - MUKANDA USANDU WA ZAMBI 1975

¹ Muze A-Izalele akatukile ku Engitu; muze jiko lia Yakomba liakatukile kuli akwa limi lia tundaka.

² Wapwishile Yunda tembele yenyi; A-Izalele apwile atu jenyi a kwayula.

³ Kalunga-lwiji wachimwene, yachina. Yordau wahilukile kunyima.

⁴ Milundu yasambile ngwe kuji a mapanga. Milundu yikepe yasambile ngwe anamapanga.

⁵ Kuchi unevu, yena kalunga-lwiji hiwachina? Ena Yordau, mba wahiluka kunyima?

⁶ Enu milundu nwakusamba ngwe kuji a mapanga? Enu milundu yikepe nwakusamba ngwe ana-mapanga?

⁷ Ena hashi, chikima kumeso ja Mwene; kumeso ja Zambi ya Yakomba,

⁸ yoze walumwine liwe Chitende cha meya; walumwine liwe lia kahia likapwe fuji lia meya.