Miaso (Masamu) 111 - MUKANDA USANDU WA ZAMBI 1975

¹ Halisenu Yehova! Mungusakwila kuli Yehova ni mbunge yami yeswe, mu punga ya akwa ululi ni mu chikungulwila.

² Yitanga ya Yehova yinene; kakuyifupa kuli waze eswe akuwahililamo.

³ Chitanga chenyi uhenya ni ulamba. Ululi wenyi wa mutolo.

⁴ Hanewulula atu yitanga yenyi ya kukomwesa. Yehova mukwa vumbi kanda mukwa keke.

⁵ Hanahana kulia kuli waze akumuvwila woma. Kumakewuluka usendo wenyi matangwa eswe.

⁶ Hanasolola ngolo ja yitanga yenyi kuli atu jenyi ha kwaaha chihinga cha mavungu.

⁷ Yitanga ya moko jenyi umwenemwene ni upatwilo. Yambo yenyi yeswe kuyakola.

⁸ Hanayikolesa ku miaka yeswe ya mutolo. Kakuyilinga ni umwenemwene ni ululi.

⁹ Hanatumu ukule kuli atu jenyi. Hanahana shimbi ya usendo wenyi ku miaka ya mutolo jina lienyi lisandu; kole ni woma.

¹⁰ Woma wa Yehova, we uputukilo wa mana. Waze eswe akulinga nikulita, malinjekela akwete. Uhaliso wenyi kuwalinduluka wa mutolo.