Miaso (Masamu) 109 - MUKANDA USANDU WA ZAMBI 1975

Kuli Njimba mukwa lutwe. Samu lia David.

¹ Zambi uhaliso wami, kanda uhola kama.

² Mumu kanwa lia ungulungulu ni kanwa lia kwonga hanapakuka kuli yami. Hanahanjika kuli yami ni limi lia mahuza.

³ Kananguseleka ni maliji a kole. Hanase jita ni yami, chitela chakuhi.

⁴ O hanalipwisa akwa kole jami mumu ha zango liami, alioze yami nakulemba.

⁵ O hanangwehe yipi ha yipema. Hananeha kole ha zango liami.

⁶ Upwise kama chingulungulu helu lienyi. Mukwa kulimika akamane kwe ku chindume chenyi.

⁷ Muze mamupatwila akamuhise. Chipwe kulemba chenyi chikalumuke shili.

⁸ Matangwa jenyi apwe akepe. Mukwo akatambule chitwamo chenyi.

⁹ Ana jenyi akapwe ashiwa. Pwo lienyi akapwe twamishi.

¹⁰ Ana jenyi akapwe yendanganyi, akwa kusungila. Akafupe kulia cho kusuku ni yikulu yo.

¹¹ Mwenya mikuli akakwate cheswe nicho. Yilambala akapupe kukilikita chenyi.

¹² Niumwe kanda akamuvwila utu wa zango. Niumwe kanda akasoloka yoze mavwila keke ana jenyi ashiwa.

¹³ Ana jenyi akapatuke. Mu chisemuko chize muchizaho jina lio likajimuke.

¹⁴ Yehova akewuluke uhenge wa akako. Mulonga wa naye kanda akaujimuna.

¹⁵ Yikatwame kumeso ja Yehova matangwa eswe, hanga akatete Chiwulwiso cho hano hashi.

¹⁶ Mumu kewulukile kusolola utu wa zango, alioze wahungumionene chiswale, ni mukwa kuhona, ni yoze wamakuka mu mbunge akaashihe.

¹⁷ Iye wazangile kushinga mba chamupwilile. Kawahililile ni yiwape kashika yapwile kusuku nenyi.

¹⁸ Walijikile ni mashingo ngwe mazalo mba anjilile muchima lienyi ngwe meya, ngwe maji mu yifwaha yenyi.

¹⁹ Akapwe ngwe mazalo kuli iye akulifuka no. Akapwe ngwe muya uze analijichika nawo matangwa eswe.

²⁰ Chino chikapwe fweto ya akwa kulimika ni yami kuli Yehova, ni ya waze mahanjika chipi cha kulimika ni mwono wami.

²¹ Alioze yena Zambi Yehova linga ni yami mumu ha jina lie; mumu utu wa zango lie upema kashika ngupulule kama.

²² Mumu nguli chiswale, ngunahono. Mbunge yami yalemana muchima.

²³ Hinaya ngwe Chizulie chize muchisuha. Hanangukapula ngwe kumbi.

²⁴ Makungunwa jami kanazeye ha kulitwamina kulia. Maji eswe kanahu mu musunya wami.

²⁵ Hinalumuka sau kuli ayo. Muze mangumona kakuhunga mitwe yo.

²⁶ Ngukwase kama Yehova Zambi yami. Ngulamwine nikulita ni utu wa zango lie.

²⁷ Akanyingike ngwo, Liapwa kwoko lie; yena Yehova wachilinga.

²⁸ Ashinge, alioze yena wahisa. Muze makatuka, sonyi mevwa alioze kavumbi ke mawahilila.

²⁹ Akwa kulimika ni yami akaafuke ni kulelesa. Akalifuke ene ni sonyi jo ngwe malifuka ni hina.

³⁰ Mungusakwila chinji kuli Yehova ni kanwa liami. Ewa, mungumuhalisa hakachi ka mbunga.

³¹ Mumu iye kumakamana ku chindume cha mukwa kuhona akamulamwine kuli waze akusopesa mbunge yenyi.