Miaso (Masamu) 108 - MUKANDA USANDU WA ZAMBI 1975

Mwaso. Samu lia David.

¹ Zambi, mbunge yami yinajikiza. Mungwimba, ewa, mungwimba uhaliso, chipwe ni ulemu wami.

² Chisaji cha kusa, ni yena kalialia laulenu. Yami mungulawisa che kucha.

³ Yehova, mungukusakwilila hakachi ka atu. Mungukwimbila uhaliso hakachi ka mavungu.

⁴ Mumu utu wa zango lie Wahiana helu lia malilu. Umwenemwene we unahete ndo ku malelwa.

⁵ Yena Zambi ukanangame helu lia malilu. Ulemu we ukapwe helu lia hashi heswe,

⁶ utukumbulule, utulamwine ni kwoko lie lia chindume, hanga yoze unamuzange akapuluke.

⁷ Zambi hanahanjika mu usandu wenyi, kashika mungulikwaza. Mungupula Shekeme. Munguzonga chikulo cha Sukote.

⁸ Ngiliate niyami, ni Manase niwami, Eframe nawa mukwa kufunga mutwe wami. Yunda niwami mukwa kuhana yiyulo.

⁹ Moape mbasia yami ya kusanyina. Kuli Endome mungumbila luhaku wami. Helu lia Filistea mungukalumioka ha kukumba.

¹⁰ Iya manguneha ku chihunda cha ngolo? Iya mangutwala ku Endome?

¹¹ Yena Zambi kwatumbilile? Zambi kushi kutuhuka ni tujita twetu?

¹² Utukwase kama kulimika ni akwa kole jetu mumu kukwasa cha atu chamokomoko.

¹³ Ku tachi ja Zambi kumutulinga ni utunu, mumu iye maliata akwa kulimika ni yetu.