Miaso (Masamu) 107 - MUKANDA USANDU WA ZAMBI 1975

MUKANDA 5

¹ Sakwilenu kúli Yehova mumu iye mupema, mumu utu wa zango lienyi wa mutolo.

² Waze Yehova waakulile ambe chocho, waze aakulile ku kwoko lia akwa kulimika no,

³ akaakunge ku yifuchi ku Chivumbuko ni ku Chitokelo; ku Norte ni ku Sule.

⁴ Endanganyine mu puya mu jila ya makango. Kawanyine chihunda cha kutwamamo.

⁵ Ha kwivwa zala ni pwila mbunge jo muchima jalezumukine.

⁶ Atetele kuli Yehova mu lamba lio iye waapulwile ku luyinda wo.

⁷ Waatwalile mu jila ya kululama, akaye ku chihunda cha kutwamamo.

⁸ Kachi atu mahalisa Yehova te, mumu ha utu wa zango lienyi, ni yitango yenyi ya kukomwesa kuli ana ja atu.

⁹ Mumu kakuyukisa mbunge yize yili ni usona. Mbunge yize yili ni zala kakuyikuchisa ni yuma yipema.

¹⁰ Waze atwamine mu milima, mu Chizulie cha kufwa, a kukasa mu luyinda ni utale,

¹¹ mumu akolemene ku maliji a Zambi, nikulelesa yiyulo ya mwe Chitunda.

¹² Kashika walimbwishile mbunge jo ni kukilikita. Alimbukile, ni yoze maakwasa wakuhi.

¹³ Mba atetele kuli Yehova mu lamba lio. Iye waalamwinyine ku luyinda wo.

¹⁴ Waachijile ku milima ni ku Chizulie cha kufwa. Wapatwile malenge jo tuyipatupatu.

¹⁵ Kachi atu mahalisa Yehova te, mumu ha utu wa zango lienyi ni yitanga yenyi ya kukomwesa kuli ana ja atu.

¹⁶ Mumu hanapulu yajilo ya mikosa. Hanatete yikungo ngwi.

¹⁷ Kakuyindamisa yihepuke mumu ha milonga yo ni uhenge wo.

¹⁸ Mbunge jo mujivwila lwaji kulia cheswacho. Kakukundama ku yikolo ya kufwa.

¹⁹ Henaho mateta kuli Yehova mu lamba lio. Mba iye maalamwina ku luyinda wo.

²⁰ Iye matuma liji lienyi nikwawuka, nikwapulula ku mawumbu a kwonwona.

²¹ Kachi atu mahalisa Yehova te, mumu ha utu wa zango lienyi ni yitanga yenyi ya kukomwesa kuli ana ja atu.

²² Amutambule yitapo ya kusakwila. Akambulule yitanga yenyi ni miaso.

²³ Waze akupalumuka ku kalunga-lwiji mu maulungu. Waze te akulingalinga milimo yo ha meya anji,

²⁴ o kakumona yitanga ya Yehova ni yikomokeso yenyi ha meya asuku.

²⁵ Mumu mamba liji, mavundula fuji ya kangonga yize muyivundula mikanya yamo.

²⁶ Muyizunduka ndo kwilu, muyinyikumuka ndo mu jondo, mbunge jo mujisangunuka mumu ha lamba.

²⁷ Kakupengwoka sali ni sali nikuzeketa ngwe mutu yoze unazengewa, ni mana jo eswe hahwa.

²⁸ Henaho mateta kuli Yehova mu lamba lio, mba iye maachiza ku luyinda wo.

²⁹ Kakuholesa kangonga kúlú, hanga mikanya yamo yikamane chizechene.

³⁰ Mba mawahilila mumu hikwahola. Chocho maaneha ku zuzu yize anazange.

³¹ Kachi atu mahalisa Yehova te, mumu ha utu wa zango lienyi, ni yitanga yenyi ya kukomwesa kuli ana ja atu.

³² Akamunangamise mu chikungulwila cha atu nawa, nikumuhalisa mu chitwamo cha makulwana.

³³ Iye kakwalumuna njiji jikapwe ngwe puya. Mafuji a meya kakwaalumuna mavu omu chau.

³⁴ Chifuchi cha kwima mihuko kakuchalumuna puya ya mungwa mumu ha ungulungulu wa waze atwamamo.

³⁵ Kakwalumuna puya yikapwe Chitende cha meya. Chifuchi chize chumu kakuchalumuna ngwe mafuji a meya.

³⁶ Kwenako matungisa akwa zala hanga akalulike chihunda chakutwamamo.

³⁷ Akakuwe mu mande, akatumbe minda ya uva, akazuke kwoko cha mihuko.

³⁸ Kakwawahisa nawa akaliokese chikolo. Chipwe yimuna jo kechi kwatayiza katepuluka.

³⁹ Cheka nawa matepuluka, mafumbama mumu ha yihungumiona, ni lamba ni chinyengo.

⁴⁰ Kakuzukwila kaleleso hali yilolo. Kakwatuma akendangane mu puya muze kumushi jila.

⁴¹ Hindu kakuchiza mukwa kuhona ku lamba nikumunangamisa, nikulinga minyachi ngwe chendo.

⁴² Mukwa kululama machimona; makawahilila, alioze uhenge weswe muupakika kanwa liawo.

⁴³ Mweswe kali ni mana manyonga yuma yino, makazewula utu wa zango lia Yehova.