Miaso (Masamu) 106 - MUKANDA USANDU WA ZAMBI 1975

¹ Halisenu Yehova! Sakwilenu kuli Yehova mumu iye mupema, mumu utu wa zango lienyi wa mutolo.

² Iya mahasa kuvuluka yilinga ya ndundo ya Yehova, hanji kusolola uhaliso wenyi?

³ Kawaha waze akufunga upatwilo, ni yoze wakulinga ululi matangwa eswe.

⁴ Yehova, ungwiwuluke kama ni vumbi lize wakupwa nalio kuli atu je. Ungunangise ni ulamwino we.

⁵ Hanga ngukamone kuwaha cha waze waatongwele; ngukawahilile ni chiseke cha vungu lie; ngukalisambe hamuwika ni chihinga che.

⁶ Twavulumwine hamuwika ni akaka; twalingile uhenge, twalingile ungulungulu.

⁷ Yikomokeso ye mu Engitu kuyalumbunukine kuli akaka. Kewulukile kulumbama cha utu wa zango lie, alioze akolemene ku Kalunga-lwiji, ewa ku Kalunga-lwiji Muchila.

⁸ Hindu waalamwinyine mumu ha jina lienyi, hanga akafumanyise ngolo jenyi ja ndundo.

⁹ Wámbilile Kalunga-lwiji Muchila nawa mba womine chau chocho waatwalile ndusu mu majinga ngwe mu chana.

¹⁰ Waapulwile ku kwoko lia yoze waavwilile kole. Waakulile ku kwoko lia mukwa kole.

¹¹ Meya afukile akwa kulimika no; kukwasalile chipwe umuwika.

¹² Hohene afulielele maliji jenyi, amwimbilile uhaliso.

¹³ Alioze kawashi avulamine yitanga yenyi. Katwaminyinyine yiyulo yenyi.

¹⁴ Evwile usolo kuhiana mu puya. Esekele Zambi mu makango.

¹⁵ Waahele chize echile, alioze waatumine kuwangama mu mbunge jo.

¹⁶ Mu chilombo evwilile ukwa Mose, hamwe ni Arone mwe musandu wa Yehova.

¹⁷ Hashi hapulikile nikumina Ndatane nikufuku chendo cha Apirame.

¹⁸ Awikile kahia mu chendo cho, mulengi wochele yingulungulu.

¹⁹ Atangile mwana-ngombe mu Horepe, nikuwayila kaponya wa kuzuzulula.

²⁰ Chocho alumwine ulemu wo ukapwe mu kulifwa cha ngombe yoze wakulia mwambu.

²¹ Avulamine Zambi Chilamwina cho yoze walingile yuma yinene mu Engitu,

²² ni yitanga ya kukomwesa mu chifuchi cha Hame, ni yuma ya kuvwisa mwongo ku Kalunga-lwiji Muchila.

²³ Kashika wambile kwaonwona kachi Mose yoze wamutongwele kamanyine kumeso jenyi mu chituwa akatewulule ufwatulo wenyi kuchina akaenyeke.

²⁴ Ewa, alelesele chifuchi chipema; kafulielele liji lienyi.

²⁵ Alinyengetelele mu mbalaka jo; kapanjikile ku liji lia Yehova.

²⁶ Kashika wazundwile kwoko lienyi hali ayo, akaanungwine mu puya;

²⁷ akanungwine munyachi wo hakachi ka mavungu nikwamwanga mu yifuchi.

²⁸ Alifutwile ni Mbale-Peore, nikulia yitapo ya afu.

²⁹ Chocho amwihile ku utenu ni yitanga yo mba chilungo chasambulukile hali ayo.

³⁰ Alioze Finehase wakatukile nikulinga upatwilo, mba chilungo achimanyishine.

³¹ Mba achivulukile kuli iye ngwe ululi ku yisemuko yeswe ya mutolo.

³² Amwihile nawa ku meya ja Meripa, chocho chipi chejile kuli Mose mumu hali ayo.

³³ Mumu o amuvundwile mu Spiritu yenyi mba wahanjikile chize kuchalitele ni mivumbo yenyi.

³⁴ Konwene nawa mavungu ngwe Yehova waambile.

³⁵ Alioze alichingile ni mavungu nikulilongesa yitanga yo.

³⁶ Avumbikile tuponya two, necho chalumukine kambwila kuli ayo.

³⁷ Ewa, chipwe anó a malunga ni a mapwo aatambwile yitapo kuli andemoniu.

³⁸ Amwangine manyinga aze keshi chitela, chipwe manyinga ja anó a malunga ni a mapwo, waze alambwile yitapo ku tuponya twa A-Kanana. Chifuchi cheswe chapihile ni manyinga.

³⁹ Chocho alichishile ni yitanga yo. Mu yitanga yo alingile ukoi.

⁴⁰ Kashika ufwatulo wa Yehova wakasumukine wa kulimika ni atu jenyi. Wevwilile lwaji chihinga chenyi.

⁴¹ Waakunjikile mu kwoko lia akwa mavungu. Aayulile kuli akwa kole jo.

⁴² Akwa kole jo aapinjishile nikwazeyesa kushi lia kwoko lio.

⁴³ Kanji kanji waapulwile alioze akolemene mu yiyulo yo, kashika aakehesele mumu ha uhenge wo.

⁴⁴ Hindu wanyongene luyinda wo muze evwile muteto wo.

⁴⁵ Wewulukile usendo wenyi mumu hali ayo. Walikonyekene nikulita ni kulumbama cha utu wa zango lienyi.

⁴⁶ Waaselele keke kuli waze eswe aatwalile mu ufunge.

⁴⁷ Yehova Zambi yetu, utulamwine kama utuchize hakachi ka mavungu nikutukungulula, hanga tukasakwile ku jina lie lisandu, tukakumbe mu uhaliso we.

⁴⁸ Yehova Zambi ya Izalele akafumane, chize ku miaka ya mutolo ndo ku miaka ya mutolo! Atu eswe ambe ngwo, Amene. Halisenu Yehova!