Miaso (Masamu) 105 - MUKANDA USANDU WA ZAMBI 1975

¹ Sakwililenu Yehova, tambikenu ha jina lienyi, ambululenu yilinga yenyi hakachi ka mavungu.

² Mwimbilenu, mwimbilenu uhaliso. Hanjikenu ha yitanga yenyi ya kukomwesa.

³ Lisambenu mu jina lienyi lisandu. Mbunge ja akwa kufupa Yehova jikawahilile.

⁴ Fupenu Yehova ni tachi jenyi. Fupenu meso jenyi matangwa eswe.

⁵ Iwulukenu yilinga yenyi ya kukomwesa yize hanalingi, ni yipupu yenyi, ni upatwilo wa mu kanwa lienyi;

⁶ enu munyachi wa Apalahama kavumbi kenyi, enu ana ja Yakomba a kutongola.

⁷ Iye Yehova Zambi yetu, upatwilo wenyi waya hashi heswe.

⁸ Iye kakwiwuluka usendo wenyi ku miaka ya mutolo; kakwiwuluka liji lize ambile ndo ku kanunu ka yisemuko.

⁹ Usendo uze akolesele ni Apalahama, ni liji lienyi lia kulishinga kuli Izake.

¹⁰ Waukolesele cheka nawa kuli Yakomba ukapwe shimbi, ni kuli Izalele ukapwe usendo wa mutolo,

¹¹ ngwenyi, Kuli yena munguhana chifuchi cha Kanana, njiza ya chihinga chenu.

¹² Shimbu te achili atu akehe ha kwaalula. Ewa, achili te akehe chikolo, njize mu chifuchi.

¹³ Atutulukile ku vungu ni vungu. Makatuka kuli akwa wanangana umwe, maya kuli atu eka.

¹⁴ Alioze iye katayijile niumwe kwalinga chipi. Chipwe mianangana waámbilile mumu hali ayo,

¹⁵ ngwenyi, Kanda nusunga waze naawayishile ni maji. Aprofeta jami kanda nwalinga nichimwe chipi.

¹⁶ Wasanyikine kapunga mu chifuchi, wamakwine mulumbu weswe wa kulia.

¹⁷ Watumine lunga kwatetekela; José amulanjishile ngwe ndungo.

¹⁸ Alemekene molu jenyi ni kuli; amukashile ni malenge,

¹⁹ ndo tangwa liji lienyi liamanunukine. Liji lia Yehova liamwesekele.

²⁰ Mwanangana watumine amutusule, mwe mukwa kuyula mavungu wamutuswile,

²¹ nikumupwisa mwene wa zuwo lienyi kanda mukwa kuyula yikumba yenyi yeswe.

²² Akakase yilolo nikulita ni upale wenyi mwene akalongese mana akwa kuyula jenyi.

²³ Izalele nawa wejile ku Engitu; Yakomba Watwamine mu chifuchi cha Hame.

²⁴ Wokesele chikolo atu jenyi; waatakamishine kuhiana waze alimikine no.

²⁵ Walumwine mbunge jo akavwile kole atu jenyi, akalinge ni tuvumbi twenyi ni ukanyame.

²⁶ Watumine kavumbi kenyi Mose hamuwika ni Arone yoze amutongwele.

²⁷ Asele hakachi ko yilayi yenyi ni yikomokeso mu chifuchi cha Hame.

²⁸ Watumine milima nikulayisako, o kakolemeneko maliji jenyi.

²⁹ Walumwine meya jo manyinga. Washihile yishi jo.

³⁰ Chifuchi cho chazalile ni manyavwi, ni mu mazuwo ja mianangana jo.

³¹ Wahanjikile mba kwejile mazaji a jiji ni yina mu manjiza jo eswe.

³² Ha vula waahele chiwe ni kahia ka kulengenya mu chifuchi cho.

³³ Walambile yinjinda yo nawa ni mikuyu yo. Wamakwine mitondo ya mu manjiza jo.

³⁴ Wahanjikile mba kwejile makumbi ni yazombwa keshi kuhasa kwaalula.

³⁵ Alile yiputa yeswe mu chifuchi cho; alile mihuko ya mavu jo.

³⁶ Walambile ana jo atangu kusemuka nawa mu chifuchi cho, we uputukilo wa tachi jo jeswe.

³⁷ Waachijileko ni oru ni prata. Kukwapwile niumwe mukwa kutalinga hakachi ka minyachi yo yeswe.

³⁸ A-Engitu evwile kuwaha muze aakatwishileko, mumu woma wo waholokele hali ayo.

³⁹ Wazazulwile lelwa likapwe lia kwafuka. Waahele kahia ka kwapangulwisa ha ufuku.

⁴⁰ Echile mba wanehene ngwali. Waakuchishile ni kulia cha mwilu.

⁴¹ Wapakwile luliwe, meya apukukilemo nikwenda muma mumu ngwe lwiji.

⁴² Mumu wewulukile liji lienyi lisandu ni Apalahama kavumbi kenyi.

⁴³ Wachijileko atu jenyi ni uwahililo. Waze waatongwele waachijileko ni miaso.

⁴⁴ Waahele yifuchi ya mavungu. Azukile milimo ya mavungu ja atu;

⁴⁵ hanga akafunge yiyulo yenyi nikumanununa shimbi jenyi. Halisenu Yehova!