Miaso (Masamu) 104 - MUKANDA USANDU WA ZAMBI 1975

¹ Mbunge yami fumanyisa Yehova. Yehova Zambi yami uli munene chikolo; unazala uhenya ni ulamba.

² Walifuka ni pangu ngwe uzalo; wazazulula malilu ngwe luhina.

³ Wasela manguji a mazuwo jenyi mu meya; wakutenga malelwa temba lienyi lia jita; wakwenda ha mapulwa ja fuji.

⁴ Wakutenga fuji tunganda twenyi, ni tuvumbi twenyi mulengi wa kahia.

⁵ Wasele fundamentu ya hashi hanga kuyichi kanyika ndo ku miaka ya mutolo.

⁶ Wafukileho ni kalunga-lwiji ngwe uzalo; meya amanyine helu lia milundu.

⁷ Ha kwambila cha yena achinyine: ha liji lie lia kukulunguza alipupwishile kuchina.

⁸ Akandukilile ku milundu; apalumukinyine ku yikulo, ndo ku chihela chize waakoleselele.

⁹ Waaselele njiza kechi kuhasa kuyihiana, kuchina mahiluka nawa akafuke hashi.

¹⁰ Kakutuma mafuji a meya mu yikulo; kakupalika hakachi ka milundu.

¹¹ Kakuhana ya kunwa kuli tushitu eswe a mu yambu. Yimbulu a mu musenge kakuhwisa pwila yo.

¹² Kwenako tujila a mwilu kakusa yaswa yo, kakuvwisa liji lio hakachi ka mitango.

¹³ Ku yipatulo ya mwilu kakuhinjila meya ha milundu; hashi kuhakuyuka ni yitanga ye.

¹⁴ Kakusokesa yambu ya yimuna, ni yiputa ha milimo ya atu, akachize kulia ku mavu,

¹⁵ ni vinyu yiza ya kuwahisa mbunge ya atu, ni maji a kulejimisa meso jenyi, ni kulia cha kutakamisa mbunge yenyi.

¹⁶ Mitondo ya Yehova hiyinayuku, misedru ya Lebano yize atumbile iye,

¹⁷ kuze tujila akutunga yaswa yo; chitokola kali ni zuwo lienyi mu yiseso.

¹⁸ Milundu yisuku ya mbala ya pembe a mu yambu, yimawe yapwa uchinyino wa seji.

¹⁹ Wasele kakweji kulweza tungonde; tangwa kuliakunyingika kunjila chalio.

²⁰ Wakulinga milima mba hikwapwa ufuku muze tushitu eswe a mu musenge akutuhuka nikuliomba.

²¹ Mievu ja ndumba kanahiohiela tushitu aakwate. Kakufupa kulia cho kuli Zambi.

²² Tangwa mulivumbuka mba kakuchina akapombe mu mena jo.

²³ Atu kakutuhuka akaye ku milimo yo nikuhondangana ndo chingoloshi.

²⁴ Yehova, yitanga ye yoka Chichize! Yeswe wayilingile ni mana. Hashi hazala tò ni upite we.

²⁵ Kuze kwatwama kalunga-lwiji nikusuha nikutoha, muze mwatwama tushitu anji kuhiana a kukalala, tushitu akepe ni anene.

²⁶ Henaho hakwenda mato. Mwenamo nawa watwama Leviatanu yoze wamutangile akahehelemo.

²⁷ Wano eswe akutala kuli yena ukaahe kulia cho ha mwaka wacho.

²⁸ Chize wakwaaha machikunga. Wakufukula ha kwoko lie no eswe mayuka ni yuma yipema.

²⁹ Musweka meso je, o malipikala. Mwatambula mwiku wo, o kumafwa, kumahiluka ku fufuta.

³⁰ Mutuma Spiritu ye, maatanga, ni yena kuwakuhuzulula ha kuzazuluka cha mavu.

³¹ Ulemu wa Yehova ukalinduluke wa mutolo. Yehova akawahilile mu yitanga yenyi.

³² Iye muze matala hashi, muhanyika. Muze masunga ku milundu muyifwinjisa mwishi.

³³ Mungwimbila Yehova miaka yeswe ya mwono wami. Mungwimba uhaliso kuli Zambi yami shimbu lieswe nguchili mutu.

³⁴ Kupukuna chami chikamuwahile. Yami munguwahilila muli Yehova.

³⁵ Akwa shili akanonge hashi; yingulungulu akajimuke. Mbunge yami fumanyisa Yehova! Halisenu Yehova!