Miaso (Masamu) 103 - MUKANDA USANDU WA ZAMBI 1975

Samu lia David

¹ Mbunge yami, fumanyisa Yehova. Yize yeswe yili muchima liami fumanyisa jina lienyi lisandu.

² Mbunge yami fumanyisa Yehova; kanda uvulama yiwape yenyi yeswe.

³ Iye kakukonekena uhenge we weswe; kakuwuka misongo ye yeswe.

⁴ Kakukula mwono we ku kwonwona; kakukusa chipangula cha utu wa zango ni keke.

⁵ Hakuyukisa kanwa lie ni yuma yipema, chocho ukweze we kuwakuhuzuluka ngwe wa pupa.

⁶ Yehova kakupatula ni yilinga ya ululi ni upatwilo kuli waze eswe anamono lamba.

⁷ Wasolwele ndako jenyi kuli Mose; yilinga yenyi wayisolwele kuli ana a Izalele.

⁸ Yehova kazala tò ni keke ni vumbi; iye makoke kutenuka, utu wa zango lienyi kuwalumbama.

⁹ Keshi kwambamba matangwa eswe, chipwe utenu wenyi keshi kuufunga ndo ku miaka ya mutolo.

¹⁰ Kalingile ni yetu nikulita ni milonga yetu; katufwetele nikulita ni uhenge wetu.

¹¹ Mumu ngwe malilu akusuha helu lia hashi, chocho watoha utu wa zango lienyi kuli waze akumuvwila woma.

¹² Chize wapwa usuku wa Chivumbuko ndo ku Chitokelo, chocho wahandununa kuli yetu Utanguko wetu.

¹³ Ngwe chisemi mavwila keke ana jenyi, chocho Yehova kakuvwila keke waze mamuvwila woma.

¹⁴ Mumu kananyingika mijimba yetu; kanewuluka ngwenyi, O kapwa fufuta tuhu.

¹⁵ Alioze ha kutwala kuli mutu, matangwa jenyi anapu ngwe mwambu. Ngwe chitemo cha mu yambu chocho akuwaha.

¹⁶ Mumu fuji muyipalikaho necho hichaya ni chihela chacho kuchichi kuchinyingika nawa.

¹⁷ Alioze utu wa zango lia Yehova kuli waze akumuvwila woma wapwa wa ku miaka ya mutolo ndo ku miaka ya mutolo. Ululi wenyi wapwa kuli ana ja ana jo;

¹⁸ kuli waze akufunga usendo wenyi, ni waze akwiwuluka shimbi jenyi kujilinga.

¹⁹ Yehova hanakolesa ngunja yenyi mwilu. Wanangana wenyi unayulu helu lia eswe.

²⁰ Enu angelo jenyi fumanyisenu Yehova, enu akwa ndundo ni tachi nwakwononokena liji lienyi, nikwivwa liji lia kuhanjika chenyi.

²¹ Fumanyisenu Yehova yenu eswe yihuji yenyi, yenu tuvumbi twenyi nwakulinga cheswacho chamupemena.

²² Fumanyisenu Yehova, enu yitanga yenyi yeswe kweswako ayula iye. Mbunge yami fumanyisa Yehova.