Miaso (Masamu) 102 - MUKANDA USANDU WA ZAMBI 1975

Kulemba cha mukwa lamba muze liamuhiana naye, mba mazukula kulinyenga chenyi kumeso ja Yehova.

¹ Yehova, ivwa kama kulemba chami; muteto wami ukanjile kuli yena.

² Kanda unguswekela meso ha tangwa lia luyinda wami. Hetamisa twitwi lie kuli yami. Ha tangwa lize mungutambika ungukumbulule kawashi.

³ Mumu matangwa jami anajimuka ngwe mwishi. Yifwaha yami hiyinaweme ngwe soka lia kahia.

⁴ Mbunge yami yinalambama ngwe mwambu; hiyinalele, mumu ngunavulama kulia chami.

⁵ Yifwaha yami yinalamata ku musunya wami mumu ha liji lia mikuma yami.

⁶ Nguli ngwe chitwa-njimbu wa mu puya. Hinalumuka ngwe chikungulu wa mu yikulu.

⁷ Nakutalatala; hinapwa ngwe ndalamusepe wa ukawenyi ha fulumba lia zuwo.

⁸ Akwa kole jami kakunguchoka tangwa lieswe nganganga. Waze ananguvwila matoto kakungutuka.

⁹ Mumu hingunali uto ngwe shima. Hinachinga kunwa chami ni masoji,

¹⁰ mumu ha utenu we ni ufwatulo we, mumu wangwanjile mba hiwangumbila.

¹¹ Matangwa jami hapwa ngwe Chizulie chize hichasuha. Ngunomu ngwe mwambu.

¹² Alioze yena Yehova unatwama wa mutolo. Chiwulwiso che muchilinduluka ndo ku yisemuko yeswe.

¹³ Kumukakatuka ukavwile keke Zaione, mumu mwaka wa kumuvwila vumbi, ewa, mwaka ausele, hiwaheta.

¹⁴ Mumu tuvumbi twe kanawahilila mu mawe jenyi. Chipwe fufuta yenyi kakuyivwila vumbi.

¹⁵ Chocho mavungu mavwila woma jina lia Yehova, ni mianangana eswe a hashi mavwila woma ulemu we.

¹⁶ Mumu Yehova hanatungu Zaione. Hanasoloka mu ulemu wenyi.

¹⁷ Iye hanapanjika kulemba cha mukwa kuyindama; kalelesele kulemba cho.

¹⁸ Chuma chino kumachisoneka ku chisemuko chize muchizaho. Munyachi mautanga muuhalisa Yehova.

¹⁹ Mumu ku kusuha cha muma mwenyi musandu hatala hashi. Yehova mwilu watalile hashi;

²⁰ Akevwe mikuma ya funge, akatusule waze hanaasela kufwa;

²¹ Hanga atu akambujole jina lia Yehova mu Zaione; uhaliso wenyi akawambujole mu Yerusaleme,

²² muze minyachi ya atu muyikunguluka hamuwika ni akwa mawanangana mukuvumbika Yehova.

²³ Iye watepulwile tachi jami mu jila wahihishile matangwa jami.

²⁴ Nambile ngwami, Zambi yami kanda unguchizaho hakachi ni hakachi ka matangwa jami, miaka ye kuyili ndusu yisemuko yeswe.

²⁵ Ku shakulu wasele fundamentu ya hashi; malilu hapwa chitanga cha moko je.

²⁶ Ayo yeswe muyikajimuka alioze yena kumukalinduluka; ewa, yeswe muyalumuka yikulu ngwe mazalo; ngwe chikuto mukayalumuna neyo muyikalumuka.

²⁷ Hindu yena kuwapwa chizechene, miaka ye kuyishi kusula.

²⁸ Ana ja tuvumbi twe kumakalinduluka. Munyachi wo kumakaukolesa kumeso je.