Miaso (Masamu) 10 - MUKANDA USANDU WA ZAMBI 1975

¹ Yehova, kuchi te wakumana kusuku? Kuchi te wakuswama ha tangwa lia lamba?

² Chingulungulu mu kulengumuka chenyi kakuhungumiona mukwa luyinda: akakwachike mu kutaka chenyi mwene.

³ Mumu chingulungulu kakulivwimba ha chize mbunge yenyi kuyakuzanga; kakuwahisa mukwa kuzo; kakulelesa Yehova.

⁴ Chingulungulu mu kulengumuka cha meso jenyi keshi kufupa Zambi. Mu kutaka chenyi cheswe Zambi keshiko.

⁵ Majila jenyi a pami wika; upatwilo we uli kusuku nenyi mwilu chikolo; nyi akwa kulimika nenyi, kakwalelesa.

⁶ Hanambe mu mbunge yenyi ngwenyi Chichi kukokoloka, nilimwe tangwa mungwiza kuyindama.

⁷ Kanwa lienyi lia tò ni kutuka, ni kwonga, ni kuhungumiona; kushi lia limi lienyi kwatwama uhuka ni uhenge.

⁸ Kakutwama ni kujikinyina hakachi ka yihunda. Ku matenga kakushiha waze keshi mutonga. Meso jenyi kakutalatala akwa luyinda.

⁹ Kakutwama ku tenga ngwe ndumba mu chivwenge chenyi. Kakujikinyina mukwa luyinda. Kakukwata mukwa luyinda muze mamutanjilikila wanda wenyi.

¹⁰ Kakupunda; kakulihetamina hanga akwa luyinda akafwe ku yitakame jenyi.

¹¹ Kakwamba mu mbunge yenyi ngwenyi, Zambi hanavulama; kanaswame; keshi kumona.

¹² Katuka kama Yehova! Zambi, olola kwoko lie; kanda uvulama akwa luyinda.

¹³ Kuchi te chingulungulu kakulelesa Zambi? Mu mbunge yenyi kanambe ngwenyi, Kuchi kuchifwetesa.

¹⁴ Alioze yena hiwachimona, mumu kuwakumona uhuka ni kuhungumiona cha atu. Kumukachifwetesa ni kwoko lie. Mwe mukwa luyinda kakulikunjika kuli yena. Yena uli chikwashi cha ana-ashiwa.

¹⁵ Makuna kwoko lia chingulungulu. Fupa ungulungulu wa mupi ndo kushi kuwana niumwe.

¹⁶ Yehova iye mwanangana ndo ku miaka ya mutolo. Mavungu hanakuwu mu chifuchi chenyi.

¹⁷ Yehova yena hiwevwa chize yimbovu akuzanga, hiwajikijisa mbunge jo. Hiwasela twitwi lie kwapanjika.

¹⁸ Hanga ukalinge ululi kuli mwana-shiwa ni mukwa luyinda, hanga mukwa hashi keshi kuvwisa mwongo nawa. Kuli Njimba mukwa lutwe. Samu lia David.