Mateu 9 - MUKANDA USANDU WA ZAMBI 1975

¹ Wanjilile mu ulungu, wazaukile, wahetele ku limbo lienyi mwene.

² Kumanyi, anehene kuli iye mukwa kalepa, kanapombo ha muhela: Yesu ha kumona Ufulielo wo, wambile kuli mukwa kalepa ngwenyi, Mwanami, hamuka; kakukonekena milonga ye.

³ Mba amwe a kuli akwa kusonyeka ambile mu mbunge ngwo, Yono kanashililika Zambi.

⁴ Alioze Yesu, nikunyingika yishinginyeka yo, wambile ngwenyi, Kuchi te nunashinginyeka yuma yipi mu mbunge jenu?

⁵ Mumu chashi chika, shina kwamba ngwami, Ngunakukonekena milonga ye, nyi; shina kwamba ngwami, Katuka, wende?

⁶ Alioze hanga nunyingike ngwenu, Mwe Mwana Mutu chiyulo akwete hano hashi cha kukonekena milonga, (hohene yamba kuli mukwa kalepa ngwenyi), Katuka, anda chalo che, uye ku zuwo lie.

⁷ Mba wakatukile, wayile ku zuwo lienyi.

⁸ Muze mbunga achimwene, alishikishilile, achichimiekene Zambi yoze wahanyine chiyulo chipwa haha kuli atu.

⁹ Shimbu Yesu mapalika kuze kulutwe, wamwene mutu, anamuvuluka ngwo, Mateu, kanatwama mu zuwo lia lijimu: neye yamba kuli iye ngwenyi, Ngukaule. Aye wakatukile, wamukawile.

¹⁰ Shimbu achili ku mesa mu zuwo, akwa kufwetesa lijimu ni yivulumunyi anji ejile, atwamine ku mesa hamwe ni Yesu ni tumbaji twenyi.

¹¹ Muze A-Fwariseu achimwene, ambile kuli tumbaji twenyi ngwo, Kuchi te Longeshi yenu anali hamwe ni akwa kufwetesa lijimu ni yivulumunyi?

¹² Alioze muze Yesu achivwile, wambile ngwenyi, Angunu keshi kufupa mbuki, alioze waze ayiza.

¹³ Alioze yénu, nukalilongese chize muchilumbunuka ngwo, Ngunazange keke, hi chitapo ko; mumu chejile mukutambika akwa ululi, alioze mukutambika yivulumunyi alikonyeke.

¹⁴ Hohene tumbaji twa Yoano yeza kuli iye, ngwo, Kuchi te yetu ni A-Fwariseu twakulitwamina kulia kanji, alioze tumbaji twe keshi kulitwamina kulia?

¹⁵ Yesu wambile kuli ayo ngwenyi, Akwa ulungi mahasa kulinyenga shimbu sandungi mapwa hamwe no, nyi? Alioze matangwa kumakeza muze makachiza sandungi kuli ayo, mba hohene makalitwamina kulia.

¹⁶ Mba niumwe masa chando cha hina lize kulishi kufunyisa ha hina likulu; mumu chando machipapulula lie hina, ni chitutulu chahiana muchipwa.

¹⁷ Chipwe atu keshi kulonga vinyu yaha mu tuku ja malambu akulu, mokomoko tuku ja malambu mujimengunuka, ni vinyu muyimwangana, ni tuku mujifwa: alioze malonga vinyu yaha mu tuku ja malambu jaha, ni yeswe yiali muyiwaha.

¹⁸ Shimbu machihanjika yino yuma kuli ayo, mukwa kuyula wejile, wamuwayilile, ngwenyi, Mwanami wa pwo haliapwila lume hafwa, alioze tweya kama, ukasayike kwoko lie hali iye, mba kumapwa ni mwono.

¹⁹ Yesu wakatukile, wamukawile hamuwika ni tumbaji twenyi.

²⁰ Umwe pwo wapwile ni musongo wa kuhita manyinga kumi lia miaka ni miaka yiali, wejile kunyima yenyi, wasele minwe ku lupula wa hina lienyi:

²¹ mumu wanyongene mu mbunge yenyi ngwenyi, Kachi mungusa wika minwe ku hina lienyi, kachi mungupwa mungunu.

²² Alioze Yesu ha kutewuluka, yamumona, wambile ngwenyi, Hamuka, mwanami, Ufulielo we hiwakupwisa mungunu. Mba mwe pwo wapwile mungunu chize ku ola yize.

²³ Muze te Yesu hanjila mu zuwo lia mukwa kuyula, wamwene akwa kwimba ndembo, ni mbunga nikuneha zungo,

²⁴ wambile ngwenyi, Lisekulenu, mumu mwana-pwo kafwileko, mu tulo ali. Alioze amusehele.

²⁵ Mba muze te hatuhwisa mbunga, wanjilile, wamukwachile ku kwoko, mwana-pwo wahindukile.

²⁶ Lufuma wacho wafumanyine mu chifuchi chize cheswe.

²⁷ Muze Yesu apalikile kuze kulutwe, tupuputa aali amukawile, nikukololoka ngwo, Tuvwile kama keke, yena, mwana David.

²⁸ Muze te hanjila mu zuwo, tupuputa ejile kuli iye: mba Yesu yamba kuli ayo ngwenyi, Nunafuliela ngwe munguhasa kulinga chino, nyi? O yamba kuli iye ngwo, Ewa, Mwene.

²⁹ Hohene wasele minwe ha meso jo ngwenyi, Chikapwe kuli yenu nikulita ni Ufulielo wenu.

³⁰ Mba meso jo alawile, ni Yesu waahele chikolo koki ngwenyi, Niumwe mutu kanda akachinyingika.

³¹ Alioze atuhukile, afumanyishine lufuma wenyi mu chifuchi chize cheswe.

³² Shimbu machituhuka, anehene kuli iye kamama, mukwa ndemoniu.

³³ Mba muze te hatuhwisa ndemoniu, kamama wahanjikile: ni mbunga alishikishilile ngwo, Kuchasolokele chocho nilimwe tangwa mu Izalele.

³⁴ Alioze A-Fwariseu ambile ngwo, Kakutuhwisa andemoniu ni tachi ja mwata wa andemoniu.

³⁵ Mba Yesu wayile nikujingajinga ku membo eswe, ni ku yihunda yeswe, nikulongesa mu masunangonga jo, nikwambujola sango lipema lia wanangana, nikuwuka misongo yeswe ni weji weswe mukachi ka atu.

³⁶ Alioze muze amwene mbunga, waavwilile keke, mumu alikatalishile nikulimbilambila ngwe mapanga waze keshi kafunga.

³⁷ Hohene yamba kuli tumbaji twenyi ngwenyi, Kucha chamwenemwene chinalumbama, alioze akwa milimo akehe.

³⁸ Liumbenu kashika kuli Mwenya kucha, hanga atume akwa milimo aye ku kucha chenyi.