Mateu 8 - MUKANDA USANDU WA ZAMBI 1975

¹ Muze te hapalumuka ku mulundu, mbunga jinene jamukawile.

² Ni kumanyi, mukwa mbumba wejile kuli iye, wamuwayilile, ngwenyi, Mwene, kachi mupala kachi muhasa kungupemesa.

³ Yesu wolwele kwoko lienyi, wamusele minwe, ngwenyi, Ngunapale; pwako mupema. Haze hene wapemene ku mbumba yenyi.

⁴ Yesu yamba kuli iye ngwenyi, Tala, kanda ukaambulwila niumwe; alioze yako, ukalilweze kuli sasendote, ukalambule chawana chize ambile Mose, chikapwe Shindakenyo kuli ayo.

⁵ Muze te Yesu hanjila mu Kafwanaume, kapitau wejile kuli iye, nikuliumba ngwenyi,

⁶ Mwene, mukweze wami kanapombo mu zuwo, ni kupinda chinji, mukwa kalepa.

⁷ Yesu yamba kuli iye ngwenyi, Mungwiza ngukamuwuke.

⁸ Kapitau wamukumbulwile ngwenyi, Mwene, yami chatelele unjile mu zuwo liami; alioze amba kama liji wika, ni mukweze wami kumahinduka.

⁹ Mumu yami nguli mutu mushi lia chiyulo, nguli no mushi lia yami mwene maswalale: mungwamba kuli yono ngwami, Yako, mba maya; kuli mukwo ngwami, Tweya, mba meza; kuli ndungo yami ngwami, Linga chino, mba machilinga.

¹⁰ Muze Yesu achivwile, wakomokene, mba wambile kuli waze akawile ngwenyi, Pundu, ngunambe kuli yenu ngwami, Chawanyine Ufulielo upwa haha, chipwe mu Izalele, ka.

¹¹ Alioze ngunambe kuli yenu ngwami, Anji a ku Chivumbuko ni ku Chitokelo kumakeza, makatwama ku mesa hamwe ni Apalahama, ni Izake, ni Yakomba mu wanangana wa malilu.

¹² Alioze kumakambila akwa wanangana mu milima ya haze: kumukukapwa malilo ni kulikopola ku mazo.

¹³ Yesu wambile kuli kapitau ngwenyi, Yako kwe, chizechene ngwe hiwafuliela, chikapwe kuli yena. Mba mukweze wenyi wahindukile ha ola yize yene.

¹⁴ Muze Yesu hanjila mu zuwo lia Petulu, wamwene naye-weno kanapombo ni kachiki.

¹⁵ Neye wasele minwe ku kwoko lienyi, mba kachiki wamukatukile, neye wahindukile, waavumbikile.

¹⁶ Muze hapwile chingoloshi, anehene kuli iye akwa andemoniu anji; neye watuhwishile maspiritu ni liji lienyi; wawukile waze eswe ayijile.

¹⁷ Hanga chikamanunuke chize ahanjikile ku kanwa lia profeta Izaia ngwenyi, Iye mwene wanjile kukokoloka chetu, wambachile misongo yetu.

¹⁸ Achi, muze Yesu amwene mbunga jinene kumujingilika, waambile akatuke aye mu sali.

¹⁹ Mukwa kusonyeka wejile, wambile kuli iye ngwenyi, Longeshi, kumungukukaulu kweswako muoya.

²⁰ Yesu yamba kuli iye ngwenyi, Mikuza kali ni mena, tujila a mwilu kali ni yaswa; alioze mwe Mwana Mutu keshi haze ha kushachila mutwe wenyi.

²¹ Mukwo wa kuli tumbaji twenyi wambile ngwenyi, Mwene, ngutayize kama nguhange kuya, ngukafunde tata.

²² Alioze Yesu yamba kuli iye ngwenyi, Ngukaule; hichika afu akafunde afu jo ene.

²³ Muze hanjila mu ulungu, tumbaji twenyi amukawile.

²⁴ Kumanyi, kwejile kangonga munene ha Chitende, chocho ulungu wafukiwile ni mikanya; ahoze iye wapwile mu tulo.

²⁵ Mba tumbaji ejile, amulawishile ngwo, Mwene, tulamwine kama, tunatoko.

²⁶ Neye yamba kuli ayo ngwenyi, Kuchi te nunevu woma, yenu akwa Ufulielo ukepe? Hohene wakatukile, Wámbilile fuji ni meya, mba kwaholele kúlú.

²⁷ Atu alishikishilile ngwo, Mutu muka yono, chipwe fuji ni meya mamwononokena?

²⁸ Muze ahetele mu sali ku chifuchi cha A-Ngandara, akwa andemoniu aali atakanyine nenyi, kanatuhuka hakachi ka mafuka, yitoji asasu chikolo, chocho niumwe kahashile kupalikila jila yize.

²⁹ No kumanyi, akololokele ngwo, Kuchi yetu ni yena, Yesu mwe Mwana Zambi? Uneza kuno mukutupinjisa shimbu mwaka kanda wiza, nyi?

³⁰ Achi, kwapwile kusuku no, chendo cha ngulu kanali.

³¹ Andemoniu aliumbile kuli iye ngwo, Kachi mututuhwisa, tutume kama, tunjile mu chendo cha ngulu.

³² Neye wambile kuli ayo ngwenyi, Yénu. No atuhukile, anjilile muli ngulu: kumanyi, chendo cheswe alundumukine ha mbongo mu Chitende, afwile mu meya.

³³ Waze aalishile, achinyine, ayile ku limbo, ambulwile yuma yeswe, ni chize chawanyine akwa ndemoniu.

³⁴ Ni kumanyi, limbo lieswe natuhukile mukupatwiza Yesu: ni muze amumwene, aliumbile kuli iye, akatuke ku manjiza jo.